NAGARI BATU MANJULUR (TAMBANG BATANG) “SELAYANG PANDANG”

 

Oleh : 

H. Epi Radisman Dt Paduko Alam, SH 

(Ketua LKAAM Kabupaten Sijunjung)

Sijunjung (SUMBAR).GP-  Turun Naiak ka bukik mambuik,  Kayu gadang banyak babuah, Kida kanan badahan mati. Bacampua jo kayu kamaik,  Gagok ganta ambo manyabuik,  Dek tuanku banyak nan batuah. Ninik mamak banyak nan sati, Alim ulama nan kiramaik.

Sungai banamo Simalako,

Aie nyo janiah tempek mandi

Bamuaro ka batang kuantan

Dari siko sajo ambo sapo

Tajalang indak tasalami

Jo sambah sajo ambo tibokan

Assalamu alaikum warahmatullahi wabarokatuh 

Jo salam sambah dianjuang,

Samo bamohon kapado Allah,

Salawat jo salam kapado Nabi,

Salam salamat diucapkan;

Sambah lalu salam kumbali,

Kapado sagalo nan adok adang,

Indak diatok dibilang gala,

Kapaatok pambilang juo,

Nan gadang kok kurang sambah,

Nan tinggi kok kurang anjuang,

Sambah jo salam pamanuhi.

Dek duduk  manganduang niat,

Kok tagak manganduang cinto,

Siang malam rintang manyabuik,

Patang pagi tak kunjuang lupo.

Suri tagantuang nak bauleh,

Buncai tarantang nak nyo sudah,

Nagari Lah Lamo dalam Randaman

Nan tasabuik Nagari Batu Manjulua

Kinilah baru kan bakakok.

Jikok dicaliak dipandangi

Pandang dakek ditukiakkan

Pandang jauh  dilayangkan

Bukan Batu Manjulua nan  bak kini

Tambang Batang da hulunyo

Turun Datuak dari Pematang Siontah

Nan banamo Datuak Rajo Hitam

Baduo jo Datuak Rajo Intan

Manuju ka  Kubangan Gajah

Mandaki ka Taruang-Taruang

Tasumbua di Lantiak Baro

Datang Rajo Jejen dari Palangkahan

Mandaki Puncak Talago Mundam

Babalah Ka Puncak Bulu Kuniang

Manurun Ka Batang Suo

Bakelok ka LontiangNone

Tasumbua di Tambang Batang

Manukiak ka Batang Lawe,

Rajo Jejen Indo Jati

Mancaliak ka subarang

Takilek ka Paroman

Tasirok darah didado,

Mahariak katiko itu,

Siapo bondo disubarang

Ndak lamo kutikonyo,

Manjawek Datuak Rajo Itam

Iko ambo disubarang Angku Rajo,

Manyubaranglah di Batu Nan Tajulua tu,

Kini ba namo Batu Manjulua

Nan ba sasaran di Ateh Guguak,

Nan ta tumpu di Lubuak Penong

Diundang ka ateh Guguak 

Malantak Tonggak Tiang Nagari

Manuju ka Tobek Hitam

Sampai ka ujuang Kulik Tanah

Nan tasabuik Taratak Suku Melayu

Nan dipimpin dek datuak Rajo Itam

Samantaro Datuak Rajo Intan

Bajalan ka Aie Luo,

Mambuek Tarak inyo disinan.

Dek lamo lambek dijalan, 

Rajo Jejen Indo Jati, 

Takana jo kawan lamo, 

Nan banamo Pono Rajo,

Nan ba taratak Di Kampuang Jirak

Dibaok ka Guguak Tangah

Rajo Jejen bagurila

Bakuliliang ka Gunuang Cino

Manapek ka Talago Tinggi

Taratak dek Datuak Bandaro Sati

Nan Ba Suku ka Caniago

Mahempa ka Talago Randah

Taratak dek datuak Panghulu Bungsu

Nan basuku ka Dalimo

Datuak Bandaro Satipun di baok Turun

Etan kataratak Tapi Balai,

Baitu juo Datuak Penghulu Bonsu.

Basentak turun kabawah,

Dibaok ka Rimbo Sikampuang

Rajo Jejen Datuak Jati Indo Jati

Bajalan ka Pauah Onggang

Etan dilontiak ba Lagundi

Taratak dek  Datuak Rajo Sampono

Nan talatak didusun Lekok,

Dikaki bukik Pauah Onggang

Dek nagari batambah rami

Datuak bakumpua hanyo lai

Etan di medan Peranginan

Nan Banamo tampek Dibalai

Dek katiko bungo kambang

Bulan cahayo ampek baleh

Tasabuik Duduak Datuak Ampek Suku:

Partamo : Suku Malayu 

Dipimpin dk Datuak Rajo Hitam

Urang Siak dibaok dek Pandito Mudo

Cadiak Pandai diangkek Bagindo Rajo

Ompang Limo dibao dek Panglimo Sati

Keduo : Suku Sikumbang

Dipimpin dek Datuak Panghulu Kayo

Urang Siak di bao dek Pandito Mogek

Cadiaik Pandai diangkek Paduko Sati

Ompang Lima dibaokan dek Panglimo Rajo

KaTigo : Suku Dalimo

Dipimpin dek DatuakPanghulu Bonsu

Suluah Bendang di diangkek Pandito Gagar

Sebagai Monti diangkek Paduko Amaek

Ompang Limo diangkek Pantingan Alam

Ka Ampek : Suku Caniago

Dipimpin dek Datuak Bandaro Sati

Suluah Bendang diangkek Pandito Rajo

Sebagai Monti diangkek Mangkudun Sati

Ompang Limo diangkek Panglimo Bumi.

Ninik mamak Batu Manjulua

Urang gadang camin taruih

Pusek jalo pumpunan ikan 

Nan mamacik talago undang

Kaganti Rajo Alam Minangkabau

Dalam kawasan Kubuang Tigo Baleh

Batu Manjulua Bak Katitiran Diujuang Tunjuak

Mancotok ka tapak tangan

Manyusu kasalo kuku

Badatuak Surang

Baulayat sendri 

Ditunjuak Dek Datuak Nan Duo Puluah

Nan diibaratkan Batu Panjang Tigo Buah

Nan Gadang latak ditangah

Diapik dek batu ketek

Malambangkan Sapuluah Koto Diile,

Sapuluah Koto dimudiak

Dan Sambilan Koto Ditangah

Tambang batang ado di dalam 

Nak siang bak hari, Nak tarang bak bulan

Elok dibilang ciek-ciek :

Adopun Datuak Nan Duo Puluah :

Sapuluah Di Mudiak,  Babalai di Aie Luo : 

Limo di Supayang :

Dt. Makhudun Sati

Dt. Rajo Alam

Dt. Rajo Nan Sati

Dt. Mangguang

Dt. Sampono Bumi

Limo di Saru-aro :

Dt. Mangkuto Sati

Dt. Rangkayo Mulia

Dt. Sutan Mantari

Dt. Malintang Sati

Dt. Rajo Nan Sati

Sapuluah Dihilia, Babalai di Batu Manjulur: 

Limo di Kobun; 

Dt. Kali Majo Dunia,

Dt. Bandaro Alam, 

Dt. Rajo Nan Sati, 

Dt. Rajo Panghulu, 

Dt. Bagindo Kayo

Limo di Ambacang Kamba/Koto Baru; 

Dt. Penghulu Sati, 

Dt. Panghulu Bosar, 

Dt. Tan Marajo, 

Dt. Ompang Limo Rajo, 

Dt. Mandaro Kuniang

Sambilan Koto Ditangah : 

Ponggang (Dt.Nangkodo Bajuang), di Basrah (Kampuang Baru) 

Tambang Batang (Dt. Bagindo Sipado), di Batu Manjulur 

Pisang Kolek (Dt. Bagindo Sati) di Kobun  (Mundam Sakti) 

Gajah Mati (Dt. Ompang Limo Rajo), di Ambacang Kamba (Koto Baru) 

Aua Kuniang (Dt. Mandaro Kuniang), di Ambacang Kamba (Koto Baru) 

Pamatang Dialai (Dt. Bagindo Kayo), di Kobun (Mundam Sakti) 

Gontiang (Dt. Tan Marajo), di Ambacang Kamba (Koto Baru) 

Muaro Suo (Dt. Rajo Alam), di Ambacang Kamba (Koto Baru)

Pamatang Barangan (Dt. Bagindo Rajo), di Palangki 

Batu Manjulur Tambang Batang

Bajanjang naiak batanggo turun

Naik dari janjang  bawah

Turun dari tanggo ateh

Dipimpin dek Datuak nan Barampek

Dalam suku nan Ampek

Jinih nan 20 (Duo Puluah)

Ba balai-balai Sitinjau Lawik

Ditangah ba labuah kudo

Batu Manjulua Tambang Batang

Adat Lamo Pusako Usang

Ba pacik ba ganggam taguah

Siang ba patungkek

Malam ba pakalang

Nan banamo Adat nan Ampek ;

Adat Nan sabana Adat, Adat Nan Diadatkan

 (Nan indak lakang dek Paneh, nan idak lapuak dek hujan, diasak indak layua, dicabuik indak mati),

Saroto adat nan teradat ,

Dan  adat istiadat

(lain lubuak lain ikan, lain padang lain bilalang).

Ninik Mamak Pemangku Adat di Batu Manjulua 

Mampunyoi soko jo Pusoko

Ka bukik balantak lacuik

Kalurah baguliang aie

Mulai dari tanah nan sabingkah, 

Rumpuik nan sahalai, 

Capo nan sabatang, 

Aie nan satitiak, 

Ka ateh taambun jantan, 

Kabawah takasiak bulan 

Panghulu nan punyo ulayat.

Tamasuak karumah nan bagonjong

Ka musajik dan ba kuba

Babungo Adat jo Syara’

Kok dicigok Subalah manyubalah :

Ka Koto Baru ba Bukik Paniasan dan Bukik Kandang Gajah.

Ka Silungkang/ Tak Boncah ; Puncak Jawi-jawi, Kasiak Baranak, Bukik Batu Bosagh  dan  Bukik Kubang Kancil

Ka Aia Luo ba Pamatang Jirek, Guguak Aie Tarabik dan Muaro Alai.

Ka Padang Sibusuak dan Basrah Ba Puncak Palansiangan, Bukik Tampang Tinggi, Guguak Pamdam dan Bukik Rimbo Ganto

Ambacang di tangah padang,

Ditingkek tangah duo tingkek

Batang pauah sadang babungo

Kok dirantang namuahnyo panjang

Elok dikumpa nak nyo singkek

Diambiak sajo nan paguno.

Tambilang di pangka lansek,

Tasisik dibaliak lantai

Lah dibilang sado nan dapek

Nan tingga untuak urang nan pandai.

  

Dari awa sampai akhia,

Gawa jo khilaf sifat kito

Nak jan binaso papan dek ukia

Barilah maaf badan ambo

#GP | Sijunjung | 18 Juni 2023.