Oleh :H. Epi Radisman Dt. Paduko Alam, SH
Wakil Ketua Umum LKAAM Prov. Sumbar
Sawahlunto (SUMBAR).GP- Turun Naiak ka bukik mambuik, Kayu gadang banyak babuah. Kida kanan badahan mati, Bacampua jokayu kamaik. Gagok ganta ambo manyabuik, Dek tuanku banyak nan batuah. Ninik mamak banyak nan sati, Alim ulama nan kiramaik.
Sungai banamo batang Lunto
Aie nyo janiah tempek mandi
Bamuaro ka batang Ombilin
Dari siko sajo ambo sapo
Tajalang indak tasalami
Jo sambah sajo ambo tibokan
Assalamu alaikum warahmatullahi wabarokatuh.
Jo salam sambah dianjuang,
Samo bamohon kapado Allah,
Salawat jo salam kapado Nabi,
Sambah lalu salam kumbali,
Kapado sagalo nan adok adang,
Indak diatok dibilang gala,
Kapaatok pambilang juo,
Nan gadang kok kurang sambah,
Nan tinggi kok kurang anjuang,
Sambah jo salam pamanuhi.
Dek duduk manganduang niat,
Kok tagak manganduang cinto,
Siang malam rintang manyabuik,
Patang pagi tak kunjuang lupo.
Suri tagantuang nak bauleh,
Buncai tarantang nak nyo sudah,
Nagari Lah Lamo dalam Randaman
Nan tasabuik Magari LUMINDAI,
Jikok dicaliak dipandangi
Pandang dakek ditukiakkan
Pandang jauh dilayangkan
Bukan Nagari Lumindai nan bak kini
Ulu Sungai Maindai dahulunyo
Dek batang Sipingai
Jo batang Mindai
Sarato jo batang Lunto
Ditiliak Nagari Lumindai Nangko
Dalam Wilayah ”Datuak Nan Salapan”,
Duo puluah Salapan JINIH
Hukum Sako tapacik dek Datauk Rajo Nan Gadang, Ba Duo jo Datuak Panghulu sati
Lumindai barajo surang,
Biang cabiak gantiang putuh
Hukum indak dapek dibandiang lai
Dirandam salapuak tali,
Di Panggang saanguih baro
Babalai sitinjau lauik
Balabuah kudo ditangahnyo
Nak siang bak hari
Nan tarang bak bulan
Elok dibilang ciek-ciek
Nak sanang dalam kiro-kiro
Adopun Suku Nan Anam dalam nagari Lumindai;
Partamo Suku Caniago,
Penghulunyo Datuak Rajo Nan Gadang
Datuak Rajo Malano Penghulu Andiko-nyo
Montinyo Pokiah Batuah
Malinnya Gindo Malin
Dubalangnyo Rajo Lelo
Kaduo Suku Dalimo.
Penghulunyo Datuak Panghulu Sati
Datuak Panghulu Dirajo Panghulu Andiko-nyo, Montinyo Pokiah Majo Kayo, Malinnya Pandito Kayo dan Dubalangnyo Marantai
Katigo Suku Piliang
Penghulu Pucuaknyo Datuak Rajo Bandaro
Montinyo Kotik Bandaro
Malinnya Malin Gindo dan
Dubalangnyo Paduko Bandaro
Kaampek Suku Supadang Ampek Dapur,
Penghulunyo Datuak Sutan Majo Lelo
Montinyo Marajo, Malinnya Malin Panduko dan Dubalangnyo Jintan
Kalimo Suku Supadang Tigo Rumah,
Penghulunyo Datuak Panghulu Sutan
Montinyo Sutan Sinaro, Malinnya Malin Sutan dan Dubalangnyo Dubalang Sutan
Kaanam Suku Supadang Rumah Baru,
Penghulunyo Datuak Rangkayo Marajo
Montinyo Panghulu Bunsu, Malinnya Malin Kayo dan Dubalangnyo Palindi
Limbak nan dari pado itu
Manuruik adat lamo pusako usang
Walau bak mano ragam dunia,
Baturuik juo saluruihnyo.
Jolong mancancang jo malateh
Mulo marambah jo malamun
Tampek manabang manaruko
Bakeh batanam baro bilah
Sajak samulo bataratak
Lalu ba dusun nan baumpuak
Sampai bakorong jo bakampuang
Lah jadi koto jo nagari
Tabantang labuah jo tapian
Tadiri balai jo galanggang
Tumbuahlah nagari KUBANG nangko
Hinggo kito dapek hiduik santoso
Namun samantangpun baitu,
Jikok dilengong suok jo kida,
Jikok dicaliak muko balakang
Satantangan jo Nagari Lumindai nangko
Lah diikek jo Buek,
Alah Dikarang Jo Jonji,
Jo nagari nan basubalahan,
Ba tali indak putuih,
Badahan indak sokah,
Sampai kini bapacik arek baganggam taguah,
Ka Nagari Kajai (Balai Batu Sandaran) ;
Ba Tanah Gontiang.
Baitu Pulo Ka Nagari Lunto :
Ba Kapuak Gadang
Ka Nagari Sibarambang :
Ba Gantiang Jariang
Ba itu pulo ka Nagari Koto Laweh :
Ba Batu Kiliran Tunjuak
Ninik Mamak Pemangku Adat di Nagari Lumindai,
Mampunyoi soko jo Pusoko
Ka bukik balantak lacuik
Kalurah baguliang aie
Mulai dari tanah nan sabingkah,
Rumpuik nan sahalai,
Capo nan sabatang,
Aie nan satitiak,
Ka ateh taambun jantan,
Kabawah takasiak bulan
Panghulu nan punyo ulayat.
Tamasuak karumah nan bagonjong
Ka musajik dan ba kuba
Babungo Adat jo Syara’
Dijua indak dimakan bali
Digadai indak di makan sando
Tibo wakotu bungo kombang
Pusako ranah nan balupak
Tabik diluhak nan Tigo,
Mulonya tanah ka dibukak
Dimulai taratak jo taruko.
Kapalo tabek jalan manurun,
Diliek di tapi parak,
Mulo Tampek kadisusun
Sapakeik dulu urang taratak
Urang koto mambuek tabek,
Dibuek mangko disusun,
Mulonyo Koto kan dibuek
Sapakaik rang taratak jo rang dusun
Bungo padi ka dihuni
Malantiang buruang nan kahulu
Mulo Nagari kan dihuni
Sapakaik dahulu sagalo Penghulu
Nagari bapaga undang
Kampuang bapaga jopusako
Dibari basosok bajurami
Balabuah batapian
Ba pandam ba pakuburan
Ba korong ba kampuang
Ba rumah batanggo
Ba sawah ba ladang
Ba balai ba musajik
Inggirih ba karek kuku,
Di karek jo pisau sirawik,
Ka parawik batang tuo,
Batuang tuo ambiak ka lantai,
Nagari bakaampek suku,
Suku ba buah paruik,
Kampuang ba nan tuo,
Rumah ba tungganai.
Kubang Namo Nagari
Bajanjang naiak batanggo turun
Naik dari janjang bawah
Turun dari tanggo ateh
Dipimpin dek Datuak Pucuak nan Baranan
Jo datuak Panghulu Andiko Nan Baduo
Dalam suku nan Anam
Jinih nan 28 (Duo Puluah Lapan)
Ba balai-balai Sitinjau Lawik
Ditangah ba labuah kudo
Adat Lamo Pusako Usang
Ba pacik ba ganggam taguah
Siang ba patungkek
Malam ba pakalang
Nan banamo Adat nan Ampek ;
Adat Nan sabana Adat, Adat Nan Diadatkan
(Nan indak lakang dek Paneh, nan idak lapuak dek hujan, diasak indak layua, dicabuik indak mati),
Saroto adat nan teradat ,
Dan adat istiadat
(lain lubuak lain ikan, lain padang lain bilalang).
Lah babagai buah rundiangan
Awa dirunuik kapamulai
Taga dek khilaf jo khilafat
Kalau batamu silik sumbiang
Kok ratak tolonglah simpai
Hinggo itu curai paparan
Lahia jo batin saukuran
Isi kulik sarupo lahia
Tibolah lukih ka limbago
Hancua siriah manjadi sapah
Sirahnyo tampak dibibia
Pariso maruang tubuah
Sajuak anggoto katujuahnyo
Tambilang di pangka lansek,
Tasisik dibaliak lantai
Lah dibilang sado nan dapek
Nan tingga untuak urang nan pandai.
Dari awa sampai akhia,
Gawa jo khilaf sifat kito
Nak jan binaso papan dek ukia
Barilah maaf badan ambo
#GP | Sawahlunto | 1 Januari 2023.
Tidak ada komentar:
Posting Komentar