Bismillahirrahmanirrahiim
Sijunjung (SUMBAR).GP- Sairiang balam jo barabah, Barabah lalu balam mandi, Tabang maraok masuak samak, Sairiang salam nan jo sambah, Sambah lalu salam kumbali, Salam taujuak ka nan banyak.Dari Koto Jadi Nagari, Ado Batapian Jo Balabuah, Asa Mulonyo Dari Taratak, Sungguahpun Ambo Tagak Badiri, Dibatin Duduak Basimpuah, Ampun Jo Maaf Nan di mintak.
Bagai awa pamulai kato
Sipatan rundiang pandahuluan
Salam taunjuak ka nan basamo
Kan ganti bajawek tangan
Assalamu alaikum warahmatullohi wabarokatuh.
Kehadapan Angku Ninik mamak, Alim ulama, Cadiak pandai,Bundo kanduang, Para Hadirin Pembaca yang budiman;
Gadang nan indak disabuikan gala,
Ketek nan indak di imbaukan namo,
Samo basah bak basimbuah,
Samo kanai bak mambiru,
Samo didalam himbauan ambo.
Jo salam sambah dianjuang,
Samo bamohon kapado Allah,
Salawat jo salam kapado Nabi,
Salam salamat diucapkan;
Dek buek bakeh bahuni,
Dek alua tak buliah tidak,
Walau bak mano ragam dunia,
Baturuik juo saluruihnyo.
Sambah lalu salam kumbali,
Kapado sagalo nan adok adang,
Indak diatok dibilang gala,
Kapaatok pambilang juo,
Nan gadang kok kurang sambah,
Nan tinggi kok kurang anjuang,
Sambah jo salam pamanuhi.
Dek duduk manganduang niat,
Kok tagak manganduang cinto,
Siang malam rintang manyabuik,
Patang pagi tak kunjuang lupo.
Suri tagantuang nak bauleh,
Buncai tarantang nak nyo sudah,
Bangkalai lah lamo dalam randaman,
Kinilah baru kan bakakok.
Manuruik Adat nan kawi
Syarak nan lazim
Adat Basandi Syara’,
Syara’ Basandi Kitabullah
Syara’ Mangato Adat Mamakai
Alam Takambang Jadi Guru
Jikok dicaliak dipandangi
Pandang dakek alah ditukiakkan
Pandang jauh alah dilayangkan
Ditiliak Nagari Koto Baru
Nan Tasabuik Ambacang Kamba
Nan lahia tahun 1822
Tapeknyo Hari Ahad tanggal 12 Rajab 1244 H (200 tahun)
Manuruik warih nan dijawek
Pusako nan ditarimo
Dek niniak mamak nan disiko
Niniak jo Cucuang kamanakan nagari ko
Datang dari rombongan Kubuang Tigo Baleh
Adat di Kubang Nan Raok di Supayang
Pusako di Saru-aro
Syara’ di Ambacang Kamba
Dibulek-an di Kabun (Mundam Sakti)
Limbak nan dari pado itu
Kato surang babulati
Kato basamo ba paiyoan
Dek dapek kato saiyo
Saiyo mangko manjadi
Dek tuah mangko sakato
Badirilah koto jo nagari
Manuruik Tambo Nagari Koto Baru
Koto dipimpin dek pucuak bulek
Nan tasabuik Datuak Nan Duo Puluah jo Koto Sambilan :
Adopun Datuak Nan Duo Puluah;
Sapuluah Datuak di Mudiak :
Limo di Supayang :
Datuak Makhudun Sati
Datuak Rajo Alam
Datuak Rajo Nan Sati
Datuak Mangguang
Datuak Sampono Bumi
Limo Datuak di Saru-aro:
Datuak Mangkuto Sati
Datuak Rangkayo Mulia
Datuak Sutan Mantari
Datuak Malintang Sati
Datuak Rajo Nan Sati
Sapuluah Datuak di Ilie :
Limo Datuak di Ambacang Kombagh (Koto Baru) :
Datuak Panghulu Bosar (Melayu)
Datuak Panghulu Sati (Patopang)
Datuak Tan Marajo (Gontiang)
Datuak Ampasng Limo Rajo
Datuak Mandaro Kuniang
Dam Limo Datuak di Kobun (Mundam Sakti) :
Datuak Kali Majo Dunia (Patopang)
Datuak Bandaro Alam (Panai)
Datuak Rajo Sampono (Melayu)
Datuak Rajo Panghulu (Tigo Niniak)
Datuak Bagindo Kayo (Kalumpang)
Sadangkan Koto Nan Sambilan adolah :
Ponggang- Tambang Batang,
Gontiang - Muaro Suo
Bulu Kuniang - Pematang Dialai
Pisang Kolek - Gajah Mati
Sambilan jo Batang Barangan
Nan bakalarasan Bodi caniago
Nan Babalai-balai di Batu Manjulua
Nagari Koto Baru
Adolah Nagari bapaga jo undang
Kampuang dijago jo pusako
Bak pituah urang tuo-tuo
Inggirih bakarek kuku
Pangarek pisau sirauik
Kaparauik si batang tuo
Tuonyo elok ka lantai
Nagari ba kaampek suku
Suku babuah paruik
Kampuang ba nan tuo
Rumah ba tungganai
Jikok disibak pulo susunan adatnyo
Nagari Koto Baru nan tadiri dari
Niniak Mamak nan Duo Puluah Satu
Badatuak nan Balimo
Dalam suku nan Ampek
Nak siang nan bak hari
Nak tarang nan bak bulan
Elok dibilang ciek-ciek :
Nan Partamo Suku Patopang:
Datuak Panghulu Sati Panghulunyo
Datuak Rajo Alam Urang tuo
Nan bamonti Bandaro Sati
Malinnyo Peto Amat
Badubalang Rajo Gumantar
Nan Kaduo Suku Melayu :
Datuak Panghulu Bosar Panghulunyo
Nan bamonti Malin Marajo
Malinnyo Pandito sulaiman
Badubalang Sutan Bagindo
Nan Katigo Suku Gontiang:
Datuak Tan Marajo Panghulunyo
Nan bamonti Rajo Panghulu
Malinnyo Pandito Majo Lelo
Badubalang Ampang Limo Sati
Nan Kaampek Suku Caniago
Datuak Ompang Limo Rajo
Nan bamonti Lenggang Parmato
Malinnyo Pandito Batuah
Badubalang Ompang Limo Putiah
Nan Kalimo Suku Piliang:
Datuak Mandaro kuniang Panghulunyo
Nan bamonti Rajo Bujang
Malinnyo Pandito Muhammad
Badubalang Bagindop Sati
Sungguahpun babagai ragam dunia
Manuruik adat lamo pusako usang
Adat Dipakai Baru,
Baju Dipakai Usang
Dimintak kapado Angku-Angku
Niniak Mamak Pamangku Adat
Khusus dinagari Koto Baru Nangko
Dan di nagari dalam wilayah Sambilan Koto
Kuek-kueklah di buek,
Endahlah di jonji
Raso jo pariso tatap dipakai
Raso dibao naik - Pariso di baok turun
Jago tali nak jan putuih
Jago dahan nak jan sokah
Jago tali pusako adat
Nan dibuek niniak moyang kito
Nan banamo adat lamo pusako usang
Limbak nan dari pado itu
Manuruik adat lamo pusako usang
Nagari Koto Baru mamiliki soko jo pusako
Nan alah dipaturun dipanaikan
Nan diwarihkan dek niniak nan manaruko
Nan Jolong mancancang jo malateh
Mulo marambah jo malamun
Tampek manabang manaruko
Bakeh batanam baro bilah
Sajak samulo bataratak
Lalu ba dusun nan baumpuak
Sampai bakorong jo bakampuang
Lah jadi koto jo nagari
Tabantang labuah jo tapian
Tadiri balai jo galanggang
Langkoklah nagari Palaluar nangko
Hinggo kito dapek hiduik santoso
Lah babagai buah rundiangan
Awa dirunuik kapamulai
Taga dek khilaf jo khilafat
Kalau batamu silik sumbiang
Kok ratak tolonglah simpai
Hinggo itu curai paparan
Lahia jo batin saukuran
Isi kulik sarupo lahia
Kalilawa dipulau rimbang
Anak ruso mati tadabiah
Kok doso mintak ditimbang
Kok salah ampun nan labiah
#GP | Sijunjung | 31 Desember 2022
Tidak ada komentar:
Posting Komentar