Sekilas Tentang Nagari/ KMHA " Kubang" Kecamatan Lembah Segar, Kota Sawahlunto.

Oleh :H.Epi Radisman dt. Paduko Alam, SH

Ketua LKAAM Kabupaten  Sijunjung

Bismillahirrahmannirrahim,

Sijunjung (SUMBAR).GP-  Turun Naiak ka bukik mambuik.  Kayu gadang banyak babuah.  Kida kanan badahan mati

Bacampua jo kayu kamaik.  Gagok ganta ambo manyabuik.  Dek tuanku banyak nan batuah.  Ninik mamak banyak nan sati

Alim ulama nan kiramaik. 

Sungai banamo batang Lunto

Aie nyo janiah tempek mandi

Bamuaro ka batang Ombilin

Dari siko sajo ambo sapo

Tajalang indak tasalami

Jo sambah sajo ambo tibokan

Assalamu alaikum warahmatullohi wabarokatuh. 

Jo salam sambah dianjuang,

Samo bamohon kapado Allah,

Salawat jo salam kapado Nabi,

Salam salamat diucapkan;

Sambah lalu salam kumbali,

Kapado sagalo nan adok adang,

Indak diatok dibilang gala,

Kapaatok pambilang juo,

Nan gadang kok kurang sambah,

Nan tinggi kok kurang anjuang,

Sambah jo salam pamanuhi.

Dek duduk  manganduang niat,

Kok tagak manganduang cinto,

Siang malam rintang manyabuik,

Patang pagi tak kunjuang lupo.

Suri tagantuang nak bauleh,

Buncai tarantang nak nyo sudah,

Nagari Lah Lamo dalam Randaman

Nan tasabuik Magari KUBANG,

Jikok dicaliak dipandangi

Pandang dakek ditukiakkan

Pandang jauh  dilayangkan

Bukan Nagari Kubang nan  bak kini

Aie Tagonang  dahulunyo

Etan talotak di Lubuak Dalam

Nak tau dikayu nan batuah

Kayu Kolek Nan Bagotah

Tampek mambunuah sibiso kowi

Kok ado biso  nan indak tatawari

Japuik lah ka pangka kayu batarok

Nan banamo Kayu Kubang

Kini Banamo Nagari Kubang

Nan talatak di Batang Lunto.

Suri tagantuang nak bauleh, 

Buncai tarantang nak nyo sudah, 

Mambangkik batang tarandam,

Adat Lamo Pusako Usang, 

Kinilah baru kan bakakok.

Manuruik Adat nan kawi

Syarak nan lazim

Adat Basandi Syara’,

Syara’ Basandi Kitabullah

Syara’ Mangato Adat Mamakai

Alam Takambang Jadi Guru

Artinyo bana  alah balicak pinang,

Alah batapuang batu,

Alah baguyang batang pinang

Badariak kalo-kalo,

Mamacik  limbago adat, 

Adat lamo pusako usang

Ditiliak Nagari Kubang Nangko

Nan Tanamo Kayu Kolek Nan Bagatah

Nan Tasabuik Batang Kubang

Dalam Wilayah ”Datuak Nan Baranam”,

Ampek Puluah Duo Jo Urang Tuo

Hukum Sako tapacik dek Datauk Bandaro Kayo

Pucuak Bulek rang namokan 

Dalam suku  nan anam 

 jinih nan 42  (Ampek Puluah Duo)

Tak kalo maso saisuak

Datuak Jindo urang gadang

Nan basuku ka Patopang

Kini banamo Datuak Bandaro Kayo

Baitu juo Dalam suku Sikumbang,

Nan  Tasabuik Datuak Paduko Sinaro

Kini Bagala Datuak Rajo Nan Godang

Nan baurek tunggang kokoh ka bumi

Nak siang bak hari

Nan tarang bak bulan

Elok dibilang ciek-ciek

Nak sanang dalam kiro-kiro

Adopun Suku Nan Anam dalam nagari Kubang:

Partamo : Suku Petopang

Penghulunyo Datuak Bandaro Kayo 

Montinyo Lenggang Sati

Malinnya Khatib Basa

Dubalangnyo Incek Sutan

Tuo Kampuang Polak : Lenggang Sampono

Tuo Kampuang Datai : Malin Marajo

Tuo Kampuang Taratak : Rajo Gumayang.

Pandito Polak : Malin Kayo

Kaduo : Suku Dalimo.

Penghulunyo Datuak Maharajo Kayo

Montinyo Bagindo Ratu

Malinnya Paduko Malin

Dubalangnyo Bandaro Sati

Tuo Kampuang Sitapiang Batu Banyak: Pengulu Garang.

Tuo Kampuang Bukik Kubang : Bandaro Rajo

Pandito Kampuang Sitapiang : Malin Bonsu

Katigo : Suku Supanjang

Penghulunyo Datuak Rajo Batuah

Montinyo Tan Marajo

Malinnya Majo Khatib 

Dubalangnyo Dubalang Sati

Tuo Kampuang Taratak Lawik : Rangkayo Batuah

Tuo Kampuang Rumah Nan Tigo : Rajo Bangso

Kaampek : Suku Sikumbang

Penghulunyo Datuak Rajo Nan Gadang

Montinyo Paduko Sinaro

Malinnya Pandito Bonsu

Dubalangnyo Bagindo Sati

Tuo Kampuang Sikumbang : Lenggang Marajo

Ka- Limo : Suku Panai : 

Penghulunyo Datuak Rajo Nan Sati

Montinyo Malano Sati

Malinnya Khatib Sampono

Dubalangnyo Lenggang Sari Pado

Tuo Kampuang Panai : Rajo Nan Putiah

Ka – Anam  : Suku Payo Badar

Penghulunyo Datuak Panghulu Marajo

Montinyo Rangkayo Tongah

Malinnya Khatib Sautan 

Dubalangnyo Palindi Nan Sati

Tuo Kampuang Payo Badar : Bagindo Rajo

Limbak nan dari pado itu

Manuruik adat lamo pusako usang

Walau bak mano ragam dunia,

Baturuik juo saluruihnyo.

Jolong mancancang jo malateh

Mulo marambah jo malamun

Tampek manabang manaruko

Bakeh batanam baro bilah

Sajak samulo bataratak

Lalu ba dusun nan baumpuak

Sampai bakorong jo bakampuang

Lah jadi koto jo nagari

Tabantang labuah jo tapian

Tadiri balai jo galanggang

Tumbuahlah nagari KUBANG nangko

Hinggo kito dapek hiduik santoso

Namun samantangpun baitu,

Jikok dilengong suok jo kida,

Jikok dicaliak muko balakang

Satantangan jo Nagari Kubang nangko

Lah diikek jo Buek,

Alah Dikarang Jo Jonji,

Jo nagari nan basubalahan,

Ba tali indak putuih, 

Badahan indak sokah, 

Sampai kini bapacik arek baganggam taguah,

Ka Nagari Pamuatan : 

Ba  Kubang Gajah,  

Ba Lurah Sangone, 

Jo  ba Aie Batumbuak.

Ka Nagari Kajai (Balai Batu Sandaran) ; 

Ba Puncak Kualo Tinggi, 

Ba Sawah rawang, 

Ba Batu Kuciang, 

Ba Kubang Putiah, 

Ba Buayan Baruak,

Jo  ba Puncak Parumahan.

Baitu Pulo Ka Nagari Lunto :  

Ba Guguak nan bulek,  

Ba Lurah Tarok,  

Ba Lontiak, 

Ba Guguak Pojik, 

Jo ba Tompok, 

Ka Nagari Sijantang :       

Ba  Lakuak Durian Tigo, 

Ba Manggi Sabatang, 

Ba Ikua lukah, 

Ba Lubuak Dalam, 

Ba Ladang Gambia, 

Ba Ngalau Tingkok,

Ba  Rimbo Sati,

Jo ba Aie batumbuak.

Ba itu pulo ka  Nagari Kolok :

Ba Gantiang Pogang, 

Ba Aie Karuah / Lurah dua baleh, 

Jo Ba Puncak Kualo Tinggi.

Ka Nagari Pianggu :

Ba Pasar Darurat, 

Ba Lontiak Simotuang,

Ba  Guguak Pudiang,

Jo Ba Bukik Kociak.

Ka  Nagari Silungkang :      

Ba Bukik Kociak, 

Ba Puncak Kuajik, 

Ba Guguak nan pantai, 

Ba Ujuang Taratak,

Ba Patamuan lurah Kasai, 

Ba Kubang Busuak, 

Ba Lakuak Bukik Kuniang,

Ba Puncak Batu nan tigo, 

Ba Tambang Ambacang, 

Ba Patamuan lurah lansek

Ba Galanggang hantu, 

Ba Puncak Kajai,

Ba Ngalau Bakato, 

Ba Puncak Sarang Onggang, 

Jo ba Kubang Gajah.

Ninik Mamak Pemangku Adat di Nagari Kubang

Mampunyoi soko jo Pusoko

Ka bukik balantak lacuik

Kalurah baguliang aie

Mulai dari tanah nan sabingkah,

Rumpuik nan sahalai,

Capo nan sabatang,

Aie nan satitiak,

Ka ateh taambun jantan,

Kabawah takasiak bulan

Panghulu nan punyo ulayat.

Tamasuak karumah nan bagonjong

Ka musajik dan ba kuba

Babungo Adat jo Syara’

Dijua indak dimakan bali

Digadai indak di makan sando

Tibo wakotu bungo kombang

Datuak baduo bamufakat

Datuak Jindo urang Gadang

Baduo jo datuak Sinaro

Mampbuek koto jo nagari

Pusako ranah nan balupak

Tabik diluhak nan Tigo,

Mulonya tanah ka dibukak

Dimulai taratak jo taruko.

Kapalo tabek jalan manurun,

Diliek di tapi parak,

Mulo Tampek kadisusun

Sapakeik dulu urang taratak

Urang koto mambuek tabek,

Dibuek mangko disusun,

Mulonyo Koto kan dibuek

Sapakaik rang taratak jo rang dusun

Bungo padi ka dihuni

Malantiang buruang nan kahulu

Mulo Nagari kan dihuni

Sapakaik  dahulu sagalo Penghulu

Nagari bapaga undang

Kampuang bapaga jopusako

Dibari basosok bajurami

Balabuah batapian

Ba pandam ba pakuburan

Ba korong ba kampuang

Ba rumah batanggo

Ba sawah ba ladang

Ba balai ba musajik

Inggirih ba karek kuku,

Di karek jo pisau sirawik,

Ka parawik batang tuo,

Batuang tuo ambiak ka lantai,

Nagari bakaampek suku,

Suku ba buah paruik,

Kampuang ba nan tuo,

Rumah ba tungganai.

Kubang  namo nagari

Anam  suku nan di dalam

Baduo Penghulu pucuaknyo

Barampek Penghulu suku

Langkok surang manti nagari

Dibantu dek ampek urang cadiak (Manti Suku)

Cukuik jo malin tiok suku

Sarato dubalang adat

Kubang Namo Nagari 

Bajanjang naiak batanggo turun

Naik dari janjang  bawah

Turun dari tanggo ateh

Dipimpin dek Datuak nan Baranan

Dalam suku nan Anam

Jinih nan 42 (Ampek puluah Duo)

Ba balai-balai Sitinjau Lawik

Ditangah ba labuah kudo

Kayu Kolek Nan Bagatah 

Nan banamo Kayu Kubang 

Manjadi Nagari sampai kini,

Adat Lamo Pusako Usang

Ba pacik ba ganggam taguah

Siang ba patungkek

Malam ba pakalang

Nan banamo Adat nan Ampek ;

Adat Nan sabana Adat, Adat Nan Diadatkan

 (Nan indak lakang dek Paneh, nan idak lapuak dek hujan, diasak indak layua, dicabuik indak mati),

Saroto adat nan teradat ,

Dan  adat istiadat

(lain lubuak lain ikan, lain padang lain bilalang).

Lah babagai buah rundiangan

Awa dirunuik kapamulai

Taga dek khilaf jo khilafat

Kalau batamu silik sumbiang

Kok ratak tolonglah simpai

Hinggo itu curai paparan

Lahia jo batin saukuran

Isi kulik sarupo lahia

Tibolah lukih ka limbago

Hancua siriah manjadi sapah

Sirahnyo tampak dibibia

Pariso maruang tubuah

Sajuak anggoto katujuahnyo

Ambacang di tangah padang,

Ditingkek tangah duo tingkek

Batang pauah sadang babungo

Kok dirantang namuahnyo panjang

Elok dikumpa nak nyo singkek

Diambiak sajo nan paguno.

Tambilang di pangka lansek,

Tasisik dibaliak lantai

Lah dibilang sado nan dapek

Nan tingga untuak urang nan pandai.

  Dari awa sampai akhia,

Gawa jo khilaf sifat kito

Nak jan binaso papan dek ukia

Barilah maaf badan am

Catatan :

Aie Batumbuak.

Bukik Kociak, 

Puncak Kuajik, 

Patamuan lurah Kasai, 

Kubang Busuak, 

 Lakuak Bukik Kuniang,

Puncak Batu nan tigo, 

Tambang Ambacang, 

Patamuan lurah lansek

Galanggang hantu, 

Puncak Kajai,

Ngalau Bakato, 

Lontiak Simotuang,

Guguak Pudiang,

Bukik Kociak.

#GP | Sijunjung | 13 Desember 2022