Bismillahirrahmanirrahim.
Sijunjung (SUMBAR).GP- Dari Koto Jadi Nagari, Ado Ba tapian jo ba labuah. Asa mulonyo dari taratak, Sungguahpun Ambo tagak badiri. Dibatin duduak basimpuah Ampun jo maaf nan dimintak, Bagai awa pamulai kato. Sipatan rundiang pandahuluan, Salam taunjuak ka nan basamo, Kan ganti bajawek tangan
Assalamu alaikum warahmatullohi wabarokatuh.
Jo salam sambah dianjuang,
Samo bamohon kapado Allah,
Salawat jo salam kapado Nabi,
Salam salamat diucapkan;
Sambah lalu salam kumbali,
Kapado sagalo nan adok adang,
Indak diatok dibilang gala,
Kapaatok pambilang juo,
Nan gadang kok kurang sambah,
Nan tinggi kok kurang anjuang,
Sambah jo salam pamanuhi.
Dek duduk manganduang niat,
Kok tagak manganduang cinto,
Siang malam rintang manyabuik,
Patang pagi tak kunjuang lupo.
Suri tagantuang nak bauleh,
Buncai tarantang nak nyo sudah,
Curai paparan
Adat Lamo Pusako Usang,
Kinilah baru kan bakakok.
Jikok dicaliak dipandangi
Pandang dakek alah ditukiakkan
Pandang jauh alah dilayangkan
Sahubuangan dengan adat lamo pusako usang
Adat Salingka Nagari di Sungai Botuang
Nagari Sungai Batuang adolah :
Salah satu Nagari ;
Dalam Wilayah Limo Koto Dimudiak
Dari Jajaran Ampek Baleh Koto
Ujuang Luhak Tanah Data
Antiang-antiang Tanah Sumpu,
Datuak Payuang Sakaki Rajo Limo Koto
Datuak Sutan Bagindo Urang Gadang Sungai Batuang
Sungai Botuang Tapak Lapan
Tampek barundiang manyalasai
Tantang Adat jo Pusako
Dalam wilayah 14 Koto
Paru Pasak Malintang
Datuak Indah Kayo urang gadangnyo
Aia Amo Sumua nan janiah
Datuak Antiko Rajo urang gadangnyo
Koto Ranah Maloro,
Nan baurang gadang Dt. Sari Paduko
Koto Tanjuang Koliang,
Nan baurang gadang Dt. Godang Rajo Lelo
Limbak nan dari pado itu
Manuruik Limbago Adat Lamo Pusako Usang
Nak siang bak hari
Nak tarang bak bulan
Elok dibilang ciek-ciek
Tantang Jajaran Ampek Baleh Koto :
Limo Koto Di Mudiak :
Paru, urang gadangnyo Dt. Endah Kayo, di Paru
Sungai Botuang, urang gadangnyo Dt. Bagindo, di Sungai Botuang
Aie Amo, urang gadangnyo Dt. Rajo Lelo, di Aie Amo
Maloro, urang gadangnyo Dt. Sari Paduko, di Maloro
Tanjuang Koliang, urang gadangnyo Dt. Godang Rajo Lelo
Ampek Koto Di Tongah :
Tambonsu, urang Gadangnyo Dt. Gadang, di Kamang
Kunangan, urang gadangnyo Dt. Jati, di Kunangan
Parik Rantang, urang gadangnyo Dt. Rajo Bosar, di Parik Rantang
Balukar Dalam, urang gadangnyo Dt. Siko Dirajo, di Balukar Dalam
Limo Koto diilie :
Tabek, urang gadangnyo Dt. Rangkayo Putiah, di Tobek
Timpeh, urang gadangnyo Dt. Naro, di Timpeh
Jao, urang gadangnyo Dt. Palindih Nan Panjang
Lobuang, urang gadangnyo Dt. Rajo Mudo, di Lobuang
Taratak Tinggi, urang gadangnyo Dt. Bagindo Sutan, di Taratak Tinggi
Manuruik adat lamo pusako usang
Bakaua adat sudah tuai
Walau bak mano ragam dunia,
Baturuik juo saluruihnyo.
Patando Basyukur kapado Allah
Batarimo kasiah kapado niniak nan manaruko
Jolong mancancang jo malateh
Mulo marambah jo malamun
Tampek manabang manaruko
Bakeh batanam baro bilah
Sajak samulo bataratak
Lalu ba dusun nan baumpuak
Sampai bakorong jo bakampuang
Lah jadi koto jo nagari
Tabantang labuah jo tapian
Tadiri balai jo galanggang
Tumbuahlah Nagari Sungai Batuang nangko
Hinggo kito dapek hiduik santoso
Limbak nan dari pado itu
Adat Dipakai Baru, Baju Dipakai Usang
Dimintak kapado Angku-Angku
Niniak Mamak Pamangku Adat
Khusus dinagari Sungai Batuang Nangko
Dan di nagari dalam wilayah
Ampek Baleh Koto umumnyo
Kuek-kueklah di buek, Endahlah di jonji
Walau bak mano ragam dunia,
Turuik juo saluruihnyo.
Indak basuruak-an luko dikoniang
Khusus kito niniak mamak pamangku adat
Baban barek singguluang batu
Kok sariang kito alah tangga
Kok kuku kito alah dikarek
Rumah gadang kito alah tirih
Antah kamano tampek batenggang
Sungguahpun demikian,
Kok datang upek jo puji
Sangko Sitawa jo sidingin
Kok duduak buliah bakisa
Tapi dilapiak nan sahalai
Kok tagak buliah bapaliang
Tapi di tanah nan sabingka
Raso jo pariso tolong dijago
Lah babagai buah rundiangan
Awa dirunuik kapamulai
Taga dek khilaf jo khilapat
Kalau batamu silik sumbiang
Kok ratak tolonglah simpai
Hinggo itu curai paparan
Lahia jo batin saukuran
Isi kulik sarupo lahia
Ganggam arek pagangan taguah
Tibolah lukih ka limbago
Hancua siriah manjadi sapah
Sirahnyo tampak dibibia
Pariso maruang tubuah
Sajuak anggoto katujuahnyo
Ambacang ditangah padang
Ditingkek tangah duo tingkek
Batang pauah sadang babungo
Jikok dirantang namuahnyo panjang
Elok dikumpa nak nyo singkek
Ambiak sajo nan ka paguno
Sakian titah bakaua adat sasudah tuai
Kato sudah hinggo bak kian
Salam salamat diucapkan
Dari awa sampai akhia
Salah jo khilaf sifat kito
Nak jan rusak papan dek ukia
Barilah maaf badan ambo
Rabbana atina fiddunya hasanah
Wafilakhiratih hasanah
Wakina azabannar
Wabillah taufik wal hidayah
Wassalamu’alaikum Warahmatullohi wabarokatuh.
#GP | Sijunjung | 2 November 2022
Tidak ada komentar:
Posting Komentar