Sekilas Tentang Nagari Palaluar, Kecamatan Koto VII.

Oleh : H. Epi Radisman Dt. Paduko Alam, SH

Ketua LKAAM Kabupaten Sijunjung

Bismillahirrahmanirrahim

Sijunjung (SUMBAR).GP-  Sairiang balam jo barabah,  Barabah lalu balam mandi, Tabang maraok masuak samak

Sairiang salam nan jo sambah, Sambah lalu salam kumbali, Salam taujuak ka nan banyak.

Dari Koto Jadi Nagari, Ado Batapian Jo Balabuah. Asa Mulonyo Dari Taratak

Sungguahpun Ambo Tagak Badiri

Dibatin Duduak Basimpuah

Ampun Jo Maaf Nan di mintak

Bagai awa pamulai kato

Sipatan rundiang pandahuluan

Salam taunjuak ka nan basamo

Kan ganti bajawek tangan

Assalamu alaikum wr.wb.

Kehadapan  Angku  Ninik mamak, Alim ulama, Cadiak  pandai,Bundo  kanduang, Para  Hadirin Pembaca yang budiman;

Gadang nan indak disabuikan gala,

Ketek nan indak di imbaukan namo,

Samo basah bak basimbuah,

Samo kanai bak mambiru,

Samo didalam himbauan ambo.

Jo salam sambah dianjuang,

Samo bamohon kapado Allah,

Salawat jo salam kapado Nabi,

Salam salamat diucapkan;

Dek buek bakeh bahuni,

Dek alua tak buliah tidak,

Walau bak mano ragam dunia,

Baturuik juo saluruihnyo.

Sambah lalu salam kumbali,

Kapado sagalo nan adok adang,

Indak diatok dibilang gala,

Kapaatok pambilang juo,

Nan gadang kok kurang sambah,

Nan tinggi kok kurang anjuang,

Sambah jo salam pamanuhi.

Dek duduk  manganduang niat,

Kok tagak manganduang cinto,

Siang malam rintang manyabuik,

Patang pagi tak kunjuang lupo.

Suri tagantuang nak bauleh,

Buncai tarantang nak nyo sudah,

Bangkalai lah lamo dalam randaman,

Kinilah baru kan bakakok.

Manuruik Adat nan kawi

Syarak nan lazim

Adat Basandi Syara’,

Syara’ Basandi Kitabullah 

Syara’ Mangato Adat Mamakai 

Alam Takambang Jadi Guru

Jikok dicaliak dipandangi

Pandang dakek alah ditukiakkan

Pandang jauh  alah dilayangkan

Ditiliak nagari Palaluar

Nan Tasabuik tampek palaluan Rajo Pagaruyuang

Nan diresmikan dek Rajo Ibadat Sumpur Kudus tahun 1822

Tapeknyo Hari Ahad tanggal 12 Rajab 1244 H (198 tahun)

Dan diulang baliak dek Sultan Ahmad Rajo Adat Buo tahun 1864

Pado Hari Ahad 22 Sya’ban 1286 H (156 tahun)

Manuruik warih nan dijawek

Pusako nan ditarimo

Dek niniak mamak nan disiko

Niniak jo Cucuang kamanakan nagari ko

Datang dari duo arah nan ba beda

Ado nan datang malalui batang Kaweh / Sinamar

Nan dipimpin dek rajo Buo

Nan bakalarasan Bodi Caniago

Mambuek taratak Parupuak

Lah manjadi Namo sampai kini

Dan Ado pulo nan datang malalui batang Ombilin

Nan dipimpin dek Tuan Kadhi Padang Gantiang

Nan bakalarasan Koto Piliang

Mambuek taratak Lubuak 

Nan tasabuik Sumpadang

Limbak nan dari pado itu

Kato surang babulati

Kato basamo ba paiyoan

Dek dapek kato saiyo

Saiyo mangko manjadi

Dek tuah mangko sakato

Badirilah koto jo nagari

Manuruik Tambo Nagari Palaluar

Koto dipimpin dek pucuak bulek

Nan bagala Dt. Rajo Babeno

Urek Gadang di pimpin dek Nieniak Gadang

Aratinyo bana Koto bapucuak bulek

Nan bakalarasan koto piliang

Baurek tunggang

Nan bakalarasan Bodi caniago

Nagari Palaluar 

Dibuek dek Sultan Ahmad Rajo Adat Buo

Nagari bapaga jo undang

Kampuang dijago jo pusako

Bak pituah urang tuo-tuo

Inggirih bakarek kuku

Pangarek pisau sirauik

Kaparauik si batang tuo

Tuonyo elok ka lantai

Nagari ba kaampek suku

Suku babuah paruik

Kampuang ba nan tuo

Rumah ba tungganai

Jikok disibak pulo susunan adatnyo

Nagari Palaluar nan tadiri dari

Niniak Mamak nan ampek diateh

Badatuak nan baranam

Cukuik jo tigo nyinyiak

Dalam suku nan anam 

Nak siang nan bak hari

Nak tarang nan bak bulan

Elok dibilang ciek-ciek :

Adopun niniak mamak nan ampek diateh

pucuak bulek nan bagala Datuak Rajo Dio

Kadhi nan bagala Kali Majo Dindo

Mantari nan bagala Dt. Mahudun

Hulu Balang nan bagala Rajo Mansur

Adopun suku nan anam

Elok  kito bilang pulo ciek-ciek ;

Nan Partamo Suku Patopang

Datuak Sinayo Panghulunyo

Nan bamonti Rangkayo Mudo

Malinnyo Khatib Marajo

Badubalang Bagindo Ratu

Inyiak Singo Mudo urang tuo

Nan Kaduo Suku Batu Kambiang

Datuak Rangkayo Bonsu Panghulunyo

Nan bamonti Rangkayo Basa

Malinnyo Malin Paduko

Badubalang Paduko Sutan

Paduko Garang urang tuo

Nan Katigo Suku Piliang

Datuak Mangguang Panghulunyo

Nan bamonti Panghulu Sati

Malinnyo Malin Batuah

Badubalang Sampono Malin

Samandaro urang tuo 

Nan Kaampek Suku Caniago

Datuak Sabatang Panghulunyo

Nan bamonti Malin Marajo

Malinnyo Khatib Brain

Badubalang Panggado Garang 

Sampono Marajo urang tuo

Nan Kalimo Suku Cubadak

Datuak Bandaro Panghulunyo

Nan bamonti Rajo Lelo

Malinnyo Khatib Bandaro

Badubalang Malin Palowan

Rangkayo Hitam urang tuo 

Nan Kaanam Suku Cumalagi

Datuak Rajo Bandaro Panghulunyo

Nan bamonti Sampono Ameh

Malinnyo Malin Kayo

Badubalang Jolabiah

Mantiko Reno urang tuo

Sungguahpun  babagai ragam dunia 

Manuruik adat lamo pusako usang

Adat Dipakai Baru, Baju Dipakai Usang

Dimintak kapado Angku-Angku 

Niniak Mamak Pamangku Adat

Khusus dinagari Palaluar Nangko

Dan di nagari dalam wilayah  Koto Tujuah Ba Sambilan Koto 

Kuek-kueklah di buek, Endahlah di jonji

Walau bak mano ragam dunia,

Turuik juo saluruihnyo. 

Raso jo pariso tatap dipakai

Raso dibao naik, Pariso di baok turun

Jago tali nak jan putuih

Jago dahan nak jan sokah

Jago tali pusako adat

Nan dibuek niniak moyang kito

Nan banamo adat lamo pusako usang

Umumnyo dilingkungan Koto Tujuah ba Sambilan Koto 

Sapuluah jo Sisawah.

Indak basuruak-an luko dikoniang

Khusus kito niniak mamak pamangku adat

Baban barek singguluang batu

Kok sariang kito alah tangga

Kok kuku kito alah dikarek

Rumah gadang kito alah tirih

Antah kamano tampek batenggang

Batenggang ka Visi jo Missi Bupati awak 

Disinan tatulih jaleh :

Revitalisasi Agama, Adat dan Budaya Minangkabau

Antah Pabilo ka basuo

Sungguahpun demikian,

Kok datang upek jo puji

Sangko Sitawa jo sidingin

Kok duduak buliah bakisa

Tapi dilapiak nan sahalai

Kok tagak buliah bapaliang

Tapi di tanah nan sabingka

Raso jo pariso tolong dijago

Lamak dek awak katuju dek urang

Limbak nan dari pado itu

Manuruik adat lamo pusako usang

Walau bak mano ragam dunia,

Baturuik juo saluruihnyo.

Nagari Palaluar mamiliki soko jo pusako

Nan alah dipaturun dipanaikan

Nan diwarihkan dek niniak nan manaruko

Nan Jolong mancancang jo malateh

Mulo marambah jo malamun

Tampek manabang manaruko

Bakeh batanam baro bilah

Sajak samulo bataratak

Lalu ba dusun nan baumpuak

Sampai bakorong jo bakampuang

Lah jadi koto jo nagari

Tabantang labuah jo tapian

Tadiri balai jo galanggang

Langkoklah nagari Palaluar nangko

Hinggo kito dapek hiduik santoso

Lah babagai buah rundiangan

Awa dirunuik kapamulai

Taga dek khilaf jo khilafat

Kalau batamu silik sumbiang

Kok ratak tolonglah simpai

Hinggo itu curai paparan

Lahia jo batin saukuran

Isi kulik sarupo lahia

Tibolah lukih ka limbago

Hancua siriah manjadi sapah

Sirahnyo tampak dibibia

Pariso maruang tubuah

Sajuak anggoto katujuahnyo

Ambacang ditangah padang

Ditingkek tangah duo tingkek

Batang pauah sadang babungo

Jikok dirantang namuahnyo panjang 

Elok dikumpa nak nyo singkek

Ambiak sajo nan ka paguno

Kalilawa dipulau rimbang

Anak ruso mati tadabiah

Kok doso mintak ditimbang

Kok salah ampun nan labiah

#GP | Sijunjung | 10 Oktober 2022.