Selayang Pandang Terhadap NAGARI / KMHA SILUKAH ( Malako Kociak )

Oleh : H. Epi Radisman Dt. Paduko Alam, SH

Ketua LKAAM Kabupaten Sijunjung

Sijunjung (SUMBAR).GP- Dari Koto Jadi Nagari, Ado Ba tapian jo ba labuah, 

Asa mulonyo dari taratak,  Sungguahpun Ambo duduak, tagak badiri.  Dibatin duduak basimpuah,  Ampun jo maaf nan dimintak

Bagai awa pamulai kato,  Sipatan rundiang pandahuluan.  Salam taunjuak ka nan basamo,  Kan ganti bajawek tangan.

Assalamu alaikum warahmatullahi wabarokatuh.

Jo salam sambah dianjuang,

Samo bamohon kapado Allah,

Salawat jo salam kapado Nabi,

Salam salamat diucapkan;

Sambah lalu salam kumbali,

Kapado sagalo nan adok adang,

Indak diatok dibilang gala,

Kapaatok pambilang juo,

Nan gadang kok kurang sambah,

Nan tinggi kok kurang anjuang,

Sambah jo salam pamanuhi.

Dek duduk  manganduang niat,

Kok tagak manganduang cinto,

Siang malam rintang manyabuik,

Patang pagi tak kunjuang lupo. 

Suri tagantuang nak bauleh, 

Buncai tarantang nak nyo sudah, 

Tanjung Lolo Malako Kociak,

Nagari Lah Lamo dalam Randaman

Nan tasabuik Nagari / KMHA  Silukah

Kinilah baru kan bakakok.

Jikok dicaliak dipandangi

Pandang dakek ditukiakkan

Pandang jauh  dilayangkan

Silukah Malako Kociak

Talatak  di ikua Luhak Kapala Rantau 

Dalam ranah Minangkabau

Nan mempunyoi Balai-Balai Adat Tanah 

Nan tasobuik Batu Gadang 

Tompek Basidang Penungguan Rajo

Rajo Adat jo Rajo Ibadat

Rajo Pulang Baliak Pai Karantau

Tamasuk sarah terimo dokumen pengawal Rajo

Diantaronyo sapucuk surek diukia didinding batu

Nan tasabuik batu ba surek

Ba bahasa melayu kuno

Ba  tahun 1638 Masehi

Kiriman  dari Sultan Perak

Rajo ka Tigo Nagari Sambilan

Nan Baisi Mamintak ka tanah pangkal

Untuk dikirim seorang Sultan

Nan ka dinobatkan manjadi rajo nan ka Ampek

Di Nagarai Sambilan Srimananti

Tanjuang Lolo Malako Kociak 

Nan tasobuik Silukah  Malako Kociak 

Nan manganut sistim pemerintahan adat

Kelarasan Bodi Caniago Bulek aie ka pamuluah, 

Bulek kato ka mufakat, 

Kok bulek dapek digolongan, 

Kok picak buliah dilayangkan  

Di pimpinan Pisoko nan baduo 

Datuak Majo Indo jo Datuak Rajo Melayu , 

Dalam Suku Nan Ampek.

Datuak Nan Baranam,

Jinih Nan 18 (Lapan Baleh) ;

Nak siang bak hari, Nak tarang bak bulan

Elok dibilang ciek-ciek, 

Nak sanang dalam kiro-kiro : 

1. Patopang  ;  Dt. Majo Indo, Panghulu pucuak. Dt. Pokiah Sati, Tungkatan Penghulu. Pandeka Malin, Manti. 

Malin Pono, Malin dan  Palimo Sutan, Dubalang. 

2. Piliang ;  Dt. Paduko Majo, Penghulu. 

Manti Majo, Monti.  Rajo Nan Kari, Malin. 

Baginda Ali, Dubalang. 

3. Melayu ; 

Dt. Rajo Malayu, Penghulu Pucuak. 

Dt. Pangulu Bosau, Tungkatan Penghulu.

Rajo Bujang, Manti.  Khatib Kayo, Malin dan 

Rajo Sutan, Dubalang. 

4. Caniago ;  Dt. Bandaro Hitam, Penghulu. 

Manti Bosau, Manti.  Malin Leman, Malin dan  Palimo Dalam, Dubalang..

Di Silukah,

Adat Lamo Pusako Usang

Ba pacik ba ganggam taguah

Dllek alam Minangkabau ;

Siang ba patungkek

Malam ba pakalang

Nan banamo Adat nan Ampek ;

Adat Nan sabana Adat, Adat Nan Diadatkan

(Nan indak lakang dek Paneh, nan idak lapuak dek hujan, diasak indak layua, dicabuik indak mati),

Saroto adat nan teradat ,

Dan  adat istiadat

(lain lubuak lain ikan, lain padang lain bilalang).

Ninik Mamak Pemangku Adat di Silukah

Mampunyoi soko jo Pusoko :

Ka bukik balantak lacuik

Kalurah baguliang aie

Mulai dari tanah nan sabingkah,

Rumpuik nan sahalai,

Capo nan sabatang,

Aie nan satitiak,

Ka ateh taambun jantan,

Kabawah takasiak bulan

Panghulu nan punyo ulayat.

Tamasuak karumah nan bagonjong

Ka musajik dan ba kuba

Kok dicigok Subalah manyubalah

Ka Manganti Ba Galogah

Ka Padang Tarok batang Siriau

Ka Paru Ba batu Aguang

Ka Aie Angek ba Damagh Ampek puluah

Ka Durian Gadang babatang sikokoh

Ambacang di tangah padang,

Ditingkek tangah duo tingkek

Batang pauah sadang babungo

Kok dirantang namuahnyo panjang

Elok dikumpa nak nyo singkek

Diambiak sajo nan paguno.

Tambilang di pangka lansek,

Tasisik dibaliak lantai

Lah dibilang sado nan dapek

Nan tingga untuak urang nan pandai.

Kok kurang tolong ditukuak 

Kok singkek tolong  diuleh,

Dan Kok senteang tolong dibilai

  Dari awa sampai akhia,

Gawa jo khilaf sifat kito

Nak jan binaso papan dek ukia

Barilah maaf badan ambo.

Catatan :

Istilah Asal Usul Nama Tempat (lokasi) dalam  Ulayat Nagari /KMHA Silukah  dan perlu didalami dan tercatat :

Tanjuang Lolo. 

Malako Kociak 

Tapuih

Batu Godang

Pinang Tungga

Wabillahi taufik walhidayah, Wasalamu Alaikum  Warahmatullahi wabarokatuh. 

#GP | Sijunjung | 10 Oktober 2022.