Sijunjung (SUMBAR).GP- Kini kito akan bacarito satantang nagori Manganti sebagai barikuik.
Bamulo banto kan talapak,
Dek ulah pandan nan ba ambun,
Bamulo kato kan dibukak,
Disusun jari mintak ampun,
Disusun jari nan Sapuluah,
Sabaleh jo simpuah mairiangi,
Dek elok kato kok salah,
Dek Suko kato kok tadorong,
Niniak Mamak dapek malunyo,
Minangkabau dapek gatahnyo,
Bari maaf Ambo Jo jari tasusun,
Kato tasalah dek manyabuik,
Rundiang taserak manyampaikan,
Bukan tambilang manggalampai,
Tambilang manggali pakuburan,
Ambo mambilang bukan dek pandai,
Mambilang untuak dipasambahkan.
Palupuah buek kalantai,
Dianyam diambacang lobuah,
AMBO mambilang bukannyo pandai,
Ujuiknyo duduak bak basimpuah,
Sambah taunjuak Jo basimpuah,
Sabarek bungka nan piawai,
Naraco luruih main daun,
Indak basibak Jo basisiah,
Indak bahinggo Jo ba bateh,
Salam taserak ka nan banyak,
Sambah ta tuntuang ka nan rami,
Kapado Niniak nan Jo mamak,
Taruih ka ka alim Jo ulama,
Sampai ka cadiak tau pandai,
Nan Mudo arif budiman,
Kaum Bundo Kanduang Samo didalam.
Kok singkek tolong diuleh,
Kok kurang tolong ditukuak,
Kok senteang tolong dibilai,
Kok panjang tolong di karek.
Niaek lah lamo nan diangan,
Rindu lah lamo nan dicinto,
Nak manatiang Siriah dicarano,
Kahadapan dunsanak nan basamo,
Dipanggang-panggang mangko digatok,
Dikirai-kirai dipapahkan,
Tatangguak ikan gulamo,
Dibilang-bilang mangko diatok,.
Dikirai-kirai dipaparkan,
Dikambang sejarah lamo:
Kok nak tau Jo Nagari Manganti,
Bukan Manganti bak kini,
Jalujua Bosi dahulunyo.
Naik turun ka Bukik Mambuik,
Kakida jalan ka Sisawah,
Babelok Taruih ka Manganti,
Singgah Sabanta di pasa jumaik.
Gagok Ambo dek manyabuik,
Dek tuanku banyak nan batuah,
Niniak Mamak banyak nan sati,
Alim ulama nan kiramaik.
Sungai banamo batang Tampo,
Aie nyo janiah tampek mandi,
Bamuaro ka batang Kuantan,
Dari Siko sajo Ambo manyapo,
Tajalang indak tasalami,
Jo sambah sajo ambo tibokan.
Assalamualaikum wr wb
Jo salam sambah dianjuang,
Samo bamohon kapado Allah,
Salawat Jo salam kapado nabi,
Salam salamat diucapkan.
Jikok dicaliak dipandangi,
Pandangan dakek ditukiakkan,
Pandangan jauah dilayangkan,
Tantang Nagari mangati nangko,
Bukan Manganti nan bak kini,
Jalujua Bosi dahulunyo,
Nan talatak di ikua Luhak Kapalo Rantau,
Dari Luhak Tanah Data bagian timua
Nan Ba ibu ka Tanjuang Bonai Aua,
Nan Bapak KA Sumpu Kuduih,
Sasawah anak jajatan,
Tamparungo anak Kundangan ,
Hinggo Paru malintang mudiak,
(Silukah, Durian Gadang Jo Silokek) ado didalam lingkuang,
Hinggo Sikunci awer Saiyo,
Manganti Namo nagari,
Nan tasabuik Jalujua Bosi,
Di bawah pengawasan DATUAK nan duo,
Nan tasabuik Datuak Duo Sakoto;
Nan partamo :
DATUAK Paduko Alam,
Basuku ka Patopang,
Nan bapunyo Koto Piobang,
Nan Tagak Dihaluan,
Nan mamacik Tambangan Adat,
Nan bapucuak bulek cewang kalangik,
Nan mamayuangi tigo suku,
Nan tasabuik Tigo Suku Diateh :
Yaitu : Suku Petopang, Suku Piliang dan Suku Caniago.
Nan Kaduo:
DATUAK Salelo nan basuku ka Malayu,
Nan ba punyo Koto Tinggi,
Nan Tagak Dikamudi,
Nan mamacik Tambang Syara',
Nan baurek Tunggang tunjam kabumi,
Nan mamayuangi Tigo Suku dibawuah :
Yaitu : Suku Malayu, Suku Kampai dan Suku Bendang,
Nak siang bak hari,
Nak tarang nan bak bulan,
Elok dibilang ciek-ciek.
Nak sanang dalam kiro-kiro:
Manganti, ba 6 (Anam) Suku,
Ba Jinih nan 28 (Duo Puluah Salapan) :
Tigo Suku Payuang Diateh :
1. Suku Petopang :
* DATUAK Paduko Alam,
Datuak duo Sakoto,
Tambangan Adat di Nagari,
Pucuak bulek cewang kalangik,
Nan Tagak Dihaluan,
Panghulu di dalam suku,
* Datuak Rajo Bandaro, Tungkatan Datuak Paduko Alam,
Pimpinan sidang Datuak Ampek suku,
* Panghulu Batuah,
urang Tuo dinagari, Pai tampek batanyo, pulang tampek babarito dek kaum tigo suku. Diateh.
* Inyiak Kupiah,
Urang Musajik ;
Malam rintang dek kitab,
Siang rintang dek pituah,
Dek saluruh Malin Jo pandito,
* Monti Majo,
Manti Majo Manti Nagari,
Nan Cadiak cendikio,
Ulasan jari sambuangan lidah,
Dek sagalo Monti tigo suku Diateh,
* Tungua Toghe,
Dubalang dalam Nagari, Nan ka manjago tigo suku diateh,
Lunak nan ka manyudu,
Kareh nan kamanakiak,
* Malin Karojan,
Urang Siak didalam suku,
Nan mangakok karajo harum jo busuak anyie,
Nan babungo Adat Jo Syara',
2. Suku Piliang:
* Datuak Indo Marajo; Penghulu didalam suku,
Nan mamcik cupak panuah di nagari,
* Malako Kayo;
Monti didalam suku,
* Ombak Gilo;
Dubalang didalam suku,
* Peto Rajo (Malin didalam suku)
3. Suku Caniago:
* Datuak Bandaro Sati;
Panghulu didalam suku,
Nan mamacik Camin Taruih di Nagari,
* Manti Garang;
Manti Didalam suku,
* Palowan Sati ;
Dubalang di dalam suku,
* Majo Pokiah;
Malin di dalam suku,
Tigo Suku Payuang Dibawuah ;
1. Malayu :
* DATUAK Salelo ;
Datuak Duo Sakoto,
Tambangan Syara' di Nagari,
Pamayuang tigo suku di Bawuah,
Nan baurek Tunggang ka pitalo bumi,
Panghulu didalam suku,
* Rangkayo Mudo;
Urang Tuo dek Datuak Salelo,
Nan mamayuangi tigo suku di Bawuah didalam Nagari,
* Paduko Rajo ;
Manti dalam nagari,
Nan Cadiak candokio, dan juo Manti di dalam suku,
* Bagindak Ali ;
Dubalang dalam Nagari, dan juo pagaran kokoh di dalam suku,
* Malin Saidi ;
Milin dalam nagari,
Imam di Musajik nan bakubah,
Dan juo malin di dalam suku,
2. Suku Kampai:
* DATUAK Pangulu Bosar
Panghulu di dalam suku,
Nan mamacik Sondi Padek di Nagari,
* Manti Sampono;
Cadiak pandai didalam suku,
* Dubalang Sutan;
Pagaran kokoh di dalam Suku.
* Malin Majo;
Pandito didalam suku
3. Suku Bendang :
* Datuak Sampono Marajo;
Pangulu di dalam suku,
Nan mamacik Gantang Popek di Nagari.
* Manti Kayo;
Cadiak Pandai di dalam suku,
* Dubalang Gagah:
Pagaran kokoh di dalam suku,
* Pokiah Kayo;
Pandito didalam suku,
Kasadonyo nan tasabuik gala,
Dalam Jinih Nan 28 (Duo Puluah Salapan),
Dalam Suku nan 6 (Anam),
Di Nagari Manganti Jalujua basi,
Sa adat sa andiko,
Ba janjang naiak,
Ba tanggo turun,
Baitu manuruik Adat Lamo Pusako Usang,
Nan Ba pacik baganggam taguah,
Siang ba patungkek,
Malam ba pakalang,
Niniak Mamak Pemangku Adat Nagari Manganti;
Mampunyoi Soko jo Pusoko
KA Bukik balantak la Cuik,
KA lurah baguliang aie,
Mulai dari tanah nan sabingka,
Aie nan satitiak,
Rumpuik nan sahalai,
Capo nan Sabatang,
Kaateh ta ambun jantan,
KA bawah takasiak bulan,
Panghulu nan punyo Pusoko Ulayat,
Tamasuak KA rumah nan bagonjong,
KA Musajik nan Baquba,
Babungo adat Jo sara',
Kok dicigok subalah manyubalah:
KA Sumpu Kuduih Sungai Sigatagh,
Ka Tamparungo ba Cubadak randah,
Ka Sisawah ba Pinang Sabatang,
Ka Durian Gadang, Sungai Manau Tikagh marantiah,
Ka Silukah ba Aie Galogah,
KA Binuang Aie Putiah ba Ulu Sariau,
Ka Pangkalan Indaruang ba Gunuang Sikai,
Ka Pangkalan Sarai ba hulu Singingi,
Namun samantang pun baitu,
Lah ditengok kiri Jo kanan,
Lah dicaliak Muko Jo balakang ;
Ampalu janjang diateh,
Pangkalan janjang di Bawuah,
Tampek mandi Datuak Sapuluah Tujuah,
Unggan jo Manganti,
Saulayat KA Duo nyo,
Tambilang di pangka Lansek,
Tasisik di baliak lantai,
Lah dibilang sado nan dapek,
Nan tingga untuak rang nan pandai.
Jikok dikambang sapapak alam,
Jikok dipalun sapalun kuku,
Tantang nangko basudah kalam,
Sambah sakiro disiko dahulu,
#GP | Sijunjung | 2 Oktober 2022
Tidak ada komentar:
Posting Komentar