Sijunjung (SUMBAR).GP- Sairiang balam jo barabah, Barabah lalu balam mandi, Tabang maraok masuak samak, Sairiang salam nan jo sambah, Sambah lalu salam kumbali, Salam taujuak ka nan banyak.
Dari Koto Jadi Nagari, Ado Ba tapian jo ba labuah, Asa mulonyo dari taratak, Sungguahpun dek duduak tagak badiri, Dibatin duduak basimpuah, Ampun jo maaf nan dimintak.
Bagai awa pamulai kato, Sipatan rundiang pandahuluan, Salam taunjuak ka nan basamo, Kan ganti bajawek tangan
Assalamualaimum Warahmatullahi Wabarokatuh.
Gadang nan indak disabuikan gala,
Ketek nan indak di imbaukan namo,
Samo basa bak basimbuah,
Samo kanai bak mambiru,
Samo didalam himbauan ambo.
Jo salam sambah dianjuang,
Samo bamohon kapado Allah,
Salawat jo salam kapado Nabi,
Salam salamat diucapkan;
Dek buek bakeh bahuni,
Dek alua tak buliah tidak,
Walau bak mano ragam dunia,
Baturuik juo saluruihnyo.
Sambah lalu salam kumbali,
Kapado sagalo nan adok adang,
Indak diatok dibilang gala,
Kapaatok pambilang juo,
Nan gadang kok kurang sambah,
Nan tinggi kok kurang anjuang,
Sambah jo salam pamanuhi.
Dek duduk manganduang niat,
Kok tagak manganduang cinto,
Siang malam rintang manyabuik,
Patang pagi tak kunjuang lupo.
Suri tagantuang nak bauleh,
Buncai tarantang nak nyo sudah,
Mambangkik batang tarandam,
Adat Lamo Pusako Usang,
Kinilah baru kan bakakok.
Manuruik Adat nan kawi
Syarak nan lazim
Adat Basandi Syara,
Syara Basandi Kitabullah
Syara Mangato Adat Mamakai
Alam Takambang Jadi Guru
Jikok dicaliak dipandangi
Pandang dakek alah ditukiakkan
Pandang jauh alah dilayangkan
Mambangkik batang tarandam
Mambangun Limbago Adat
Alah manuruik alua jo patuik
Alah manuruik labuah nan pasa
Artinyo bana alah balicak pinang,
Alah batapuang batu,
Alah sasuko nan sanagari,
Adat alah diisi -
Limbago alah dituang.
Alah baguyang batang pinang
Badariak kalo-kalo,
Darah alah dikacau
Dagiang alah dilapah
Tanduak alah ditanam,
Ditiliak Sikaladi nangko
Nan Tanamo "Siko- La -Di"
Dalam Wilayah Datuak Nan 12”,
Tigo Baleh Jo Urang Tuo
Hukum Sako tapacik de Datauk Paduko Rajo
"Siko-La- Di" dibawah pimpinan Urang Tuo Datuak Paduko Rajo, Jo Datuak nan barampek, suku nan Ampek, jinih nan 19 (Sambilan Baleh)
Adopun Suku Nan Ampek;
Partamo : Suku Petopang
Penghulunyo Datuak Penghulu Batuah
Montinyo Rajo Alam
Malinnya Palito Malin
Dubalangnyo Rajo Nan Putiah
Dan Baurang tuo Sari Pado Putiah
Kaduo : Suku Piliang.
Penghulunyo Datuak Mongguang
Montinyo Monti Sati
Malinnya Pandito Bonsu
Dubalangnyo Rajo Sati
Dan baurang tuo Sutan Pamuncak
Katigo : Suku Caniago
Penghulunyo Datuak Mongguang
Montinyo Monti Penghulu
Malinnya Khatib Sampono
Dubalangnyo Dubalang Sati
Dan baurang tuo Pono Bumi
Kaampek : Suku Melayu
Penghulunyo Datuak Paduko Sareno
Montinyo Monti Melayu
Malinnya Palito Kari
Dubalangnyo Dubalang Arab
Bukan Sikaladi Bak kini
Siko La Di dahulunyo
Kini banamo Sikaladi
Sikaladi adolah
suatu kesatuan masyarakat hukum adat
Nan mampunyoi soko jo pusoko
Pusoko Nagari Sikaladi :
Bapanghulu Ba Ampek Suku
Ba Urang Tuo ka Datuak Paduko Rajo
Ba balai-balai Adat ba lantai Tanah,
Ba atok Langik,
Ba dindiang Angin
Ba sidang ba pantang hujan
Jikok dicigok Hilia ka Mudiak,
Jikok dipandang timua jo barat
Sikaladi mampunyai hinggo jo babataeh :
Ka Pamatang Panjang basupadan jo Aie baragiah
Ulayat Datuak Kayu Merah
Ka Batu Ajuang jo olahan Datuak Paduko Rajo
Atau jo Datuak Penghulu Tunggagh
Ka Lubuak Tarok basupadan jo Talago Pipik
Ulayat Datuak Rajo Lelo
Ka Ambacang Kamba/Koto Baru jo Bukik Situalang
Ulayat Datuak Rajo Alam
Ka Palangki basupadan jo Bukik Capang Tigo/Batang Barangan
Ulayat Datuak Mogek Kanamaan
Kok Tibo Sonak dihulu
Sikuju dari Muaro
Dibawah Pinang ditimpo upiah
Disalaikan di balai-balai adat tanah
Sacaro bajanjang naik batanggo turun
Biang capiak gantiang putuih
Kini, Ninik mamak Sikaladi,
Menambah ukiran bersejarah.
Mangukuhkan Limbago Adat Lamo Pusako Usang
Nan banamo Kerapatan Adat Sikaladi
Untuk itu, mari kito bersyukur kapado Allah Swt, Dengan mengucapkan Allhamdulillah hirabbil alamin........, Dan Berselawat Kapado Nabi Muhammad Saw. Allahummasyalialah Saidina Muhammad,
waalaalisuaidinna Muhhammad
Filalamina innaka hamidul majid,
Saroto mengucapkan Selamat;
kapado pemangku adat, ulama, codiak pandai jo bundo kanduang ,
Cucuang kamanakan di Sikaladi nangko
Dan Terakhir ; Tarimo kasiah banyak kami sampaikan
kapado Angku Ir. Asri Antipen Dt. Paduko Rajo, Urang Tuo dek Datuak Nan Duo Baleh, nan alah merekomendasikan Sikaladi, sahinggo dapek dikukuhkan Limbago Adat Lamo Pusako Usang
dan Kerapatan Adat Sikaladi.
Limbak nan dari pado itu
Manuruik adat lamo pusako usang
Mambangkik batang tarandam
Walau bak mano ragam dunia,
Baturuik juo saluruihnyo.
Patando Basyukur kapado Allah
Batarimo kasiah kapado niniak nan manaruko
Jolong mancancang jo malateh
Mulo marambah jo malamun
Tampek manabang manaruko
Bakeh batanam baro bilah
Sajak samulo bataratak
Lalu ba dusun nan baumpuak
Sampai bakorong jo bakampuang
Lah jadi koto jo nagari
Tabantang labuah jo tapian
Tadiri balai jo galanggang
Tumbuahlah Sikaladi nangko
Hinggo kito dapek hiduik santoso
Ambacang di tangah padang,
Ditingkek tangah duo tingkek
Batang pauah sadang babungo
Kok dirantang namuahnyo panjang
Elok dikumpa nak nyo singkek
Diambiak sajo nan paguno
Lah babagai buah rundiangan
Awa dirunuik kapamulai
Taga dek khilaf jo khilafat
Kalau batamu silik sumbiang
Kok ratak tolonglah simpai
Hinggo itu curai paparan
Lahia jo batin saukuran
Isi kulik sarupo lahia
Tibolah lukih ka limbago
Hancua siriah manjadi sapah
Sirahnyo tampak dibibia
Pariso maruang tubuah
Sajuak anggoto katujuahnyo
Dari awa sampai akhia,
Gawa jo khilaf sifat kito
Nak jan binaso papan dek ukia
Barilah maaf badan ambo
Wabillahi taufik walhidayah Wassalamu'alaikum warahmatullahi wabarokatuh.
#GP | Sijunjung | 27 Oktober 2022.
Tidak ada komentar:
Posting Komentar