Adat Salingka Nagari Sijunjung, Kecamatan Sijunjung Kabupaten Sijunjung.

Oleh : H. Epi Radisman Dt. Paduko Alam, SH

Ketua LKAAM Kabupaten Sijunjung  

HP. 081363342911

Bismillahirrahmanirrahim,

Sijunjung (SUMBAR).GP-  Sairiang balam jo barabah,  Barabah lalu balam mandi, Tabang maraok masuak samak,  Sairiang salam nan jo sambah,  Sambah lalu salam kumbali, Salam taujuak ka nan banyak.

Dari Koto Jadi Nagari,  Ado Batapian Jo Balabuah,  Asa Mulonyo Dari Taratak

Sungguahpun Ambo Tagak Badiri,  Dibatin Duduak Basimpuah,  Ampun Jo Maaf Nan di mintak,  Bagai awa pamulai kato, Sipatan rundiang pandahuluan,  Salam taunjuak ka nan basamo,  Kan ganti bajawek tangan

Assalamu’alaikum Warahmatullahi Wabarokatuh.

Gadang nan indak disabuikan gala,

Ketek nan indak di imbaukan namo,

Samo basah bak basimbuah,

Samo kanai bak mambiru,

Samo didalam himbauan ambo. 

Jo salam sambah dianjuang,

Samo bamohon kapado Allah,

Salawat jo salam kapado Nabi,

Salam salamat diucapkan;

Dek buek bakeh bahuni,

Dek alua ndak buliah tidak,

Walau bak mano ragam dunia,

Baturuik juo saluruihnyo. 

Sambah lalu salam kumbali,

Kapado sagalo nan adok adang,

Indak diatok dibilang gala,

Kapaatok pambilang juo,

Nan gadang kok kurang sambah,

Nan tinggi kok kurang anjuang,

Sambah jo salam pamanuhi.

Dek duduk  manganduang niat,

Kok tagak manganduang cinto,

Siang malam rintang manyabuik,

Patang pagi tak kunjuang lupo.

Suri tagantuang nak bauleh,

Buncai tarantang nak nyo sudah,

Sijunjuang salayang pandang

Kinilah baru kan bakakok.

Manuruik Adat nan kawi

Syarak nan lazin

Adat Basandi Syara’,

Syara’ Basandi Kitabullah

Syara’ Mangato Adat Mamakai

Alam Takambang Jadi Guru

Jikok dicaliak dipandangi

Pandang dakeh alah ditukiaan

Pandang jauah alah dilayangkan

Tantang Nagari Sijunjung nangko;

Ditiliak nagari Sijunjuang

Nan Tasabuik Istano Puti Junjuang

Nan barasa dari namo putri

Kamanakan Syeh Mukhsin

Nan banamo PUTI  JUNJUANG

Sijunjuang Lahianyo Hari Sanoyan

Pado Abad nan ka XII (Duo Baleh)

Tapeknyo 12 Rabiul Awal  1156 H

Nan dilambangkan mambonam batu godang

Nan dinamokan Bukik Batu Tabonek

Nan tiok tahun diparingati

Nan tasobuik Hari Katobek

Untuak mambayie kaua sasudah tuai

Jikok disibak pulo susunan adatnyo

Sijunjuang Kotonyo Ampek

Nan Partamo Koto Bukik Sosai, urang gadangnyo Dt. Bandaro Sati

Nan Kaduo Koto Gunuang Medan, urang gadangnyo Dt. Tan Mantari

Nan Katigo Koto Danau, urang gadangnyo Dt. Lubuak Kayo

Nan Kaampek  Koto Bukik Kunik, urang gadangnyo Dt. Pamatang Sati

Tibo wakotu bungo kombang

Datuak Barampek bamufakat

Mampabuek koto jo nagari

Pusako ranah nan balupak

Tabik diluhak nan Tigo,

Mulonya tanah ka dibukak

Dimulai taratak jo taruko.

Kapalo tabek jalan manurun,

Diliek di tapi parak,

Mulo Tampek kadisusun

Sapakeik dulu urang taratak

Urang koto mambuek tabek,

Dibuek mangko disusun,

Mulonyo Koto kan dibuek

Sapakaik rang taratak jo rang dusun

Bungo padi ka dihuni

Malantiang buruang tabang kahulu

Mulo Nagari kan dihuni

Sapakaik  dahulu sagalo Penghulu

Nagari bapaga undang

Kampuang bapaga jo pusako

Dibari basosok bajurami

Balabuah batapian

Ba pandam ba pakuburan

Ba korong ba kampuang

Ba rumah batanggo

Ba sawah ba ladang

Ba balai ba musajik

Inggirih ba karek kuku,

Di karek jo pisau sirawik,

Ka parawik batang tuo,

Batuang tuo ambiak ka lantai,

Nagari bakaampek suku,

Suku ba buah paruik,

Kampuang ba nan tuo,

Rumah ba tungganai.

Dek dapek kato saiyo

Kok Bulek lah dapek digolongkan

Kok Pipiah lah dapek dilayangkan 

Jolong mancancang jo malateh

Mulo marambah jo malamun

Tampek manabang manaruko

Bakeh batanam baro bilah

Sajak samulo bataratak

Lalu ba dusun nan baumpuak

Sampai bakorong jo bakampuang

Lah jadi koto jo nagari

Tabantang labuah jo tapian

Tadiri balai jo galanggang

Tumbuahlah nagari Sijunjuang nangko

Hinggo dapek hiduik santoso

Sijunjuang namo nagari

Tujuah  suku nan di dalam

Barampek Penghulu pucuaknyo

Baranan Penghulu suku

Langkok surang manti nagari

Dibantu dek Linmo  urang cadiak (Manti Suku)

Cukuik jo malin tiok suku

Sarato dubalang adat

Sijunjuang Namo Nagari

Cukuik jo Kecamatan Sijunjuang

Sarato jo namo Kabupaten Sijunjung

Bajanjang naiak batanggo turun

Naik dari janjang  bawah

Turun dari tanggo ateh

Dipimpin dek Inyiak nan barampek

Dalam suku nan Tujuah

Jinih nan 32 (Tigo Puluah Duo)

Ba balai-balai Sitinjau Lawik

Ditangah ba labuah kudo

Nak siang bak hari

Nan tarang bak bulan

Elok dibilang ciek-ciek

Nak sanang dalam kiro-kiro

Sijunjuang ba puti Junjuang

Adat Lamo Pusako Usang

Ba pacik ba ganggam taguah

Siang ba patungkek

Malam ba pakalang

Nan banamo Adat nan Ampek ;

Adat Nan sabana Adat, Adat Nan Diadatkan

 (Nan indak lakang dek Paneh, indak lapuak dek hujan, diasak indak layua, dicabuik indak mati),

Saroto adat nan teradat dan  adat istiadat

(lain lubuak lain ikan, lain padang lain bilalang).

Ninik Mamak Pemangku Adat di Sijunjuang

Mampunyoi soko jo Pusoko

Ka bukik balantak lacuik

Kalurah baguliang aie

Mulai dari tanah nan sabingkah,

Rumpuik nan sahalai,

Capo nan sabatang,

Aie nan satitiak,

Ka ateh taambun jantan,

Kabawah takasiak bulan

Panghulu nan punyo ulayat.

Tamasuak karumah nan bagonjong

Ka musajik dan ba kuba

Babungo Adat jo Syara’

Ambacang di tangah padang,

Ditingkek tangah duo tingkek

Batang pauah sadang babungo

Kok dirantang namuahnyo panjang

Elok dikumpa nak nyo singkek

Diambiak sajo nan paguno.

Tambilang di pangka lansek,

Tasisik dibaliak lantai

Lah dibilang sado nan dapek

Nan tingga untuak urang nan pandai.

  

Dari awa sampai akhia,

Gawa jo khilaf sifat kito

Nak jan binaso papan dek ukia

Barilah maaf badan ambo

Wabillahi Taufiq walhidayah, Wassalamu'alaikum warahmatullahi wabarokatuh.

#GP | Sijunjung | 20 Oktober 2022