Ketua LKAAM Kabupaten Sijunjung
Bismillahirrahmanirrahim,,,,
Sijunjung (SUMBAR).GP- Sairiang balam jo barabah, Barabah lalu balam mandi, Tabang maraok masuak samak, Sairiang salam nan jo sambah, Sambah lalu salam kumbali, Salam taujuak ka nan banyak.
Bagai awa pamulai kato, Sipatan rundiang pandahuluan, Salam taunjuak ka PAMBACO, Kan ganti bajawek tangan
Assalamu alaikum warahmatullahi wabarokatuh.
Gadang nan indak disabuikan gala,
Ketek nan indak di imbaukan namo,
Samo basa bak basimbuah,
Samo kanai bak mambiru,
Samo didalam himbauan ambo.
Jo salam sambah dianjuang,
Samo bamohon kapado Allah,
Salawat jo salam kapado Nabi,
Salam salamat diucapkan;
Dek buek bakeh bahuni,
Dek alua tak buliah tidak,
Walau bak mano ragam dunia,
Baturuik juo saluruihnyo.
Sambah lalu salam kumbali,
Kapado sagalo nan adok adang,
Indak diatok dibilang gala,
Kapaatok pambilang juo,
Nan gadang kok kurang sambah,
Nan tinggi kok kurang anjuang,
Sambah jo salam pamanuhi.
Dek duduk manganduang niat,
Kok tagak manganduang cinto,
Siang malam rintang manyabuik,
Patang pagi tak kunjuang lupo.
Suri tagantuang nak bauleh,
Buncai tarantang nak nyo sudah,
Mambangkik batang tarandam,
Adat Lamo Pusako Usang,
Kinilah baru kan bakakok.
Manuruik Adat nan kawi
Syarak nan lazim
Adat Basandi Syara,
Syara Basandi Kitabullah
Syara Mangato Adat Mamakai
Alam Takambang Jadi Guru
Jikok dicaliak dipandangi
Pandang dakek alah ditukiakkan
Pandang jauh alah dilayangkan
Mambangkik batang tarandam
Mambangun Limbago Adat
Alah manuruik alua jo patuik
Alah manuruik labuah nan pasa
Artinyo bana alah balicak pinang,
Alah batapuang batu,
Alah sasuko nan sanagari,
Adat alah diisi -
Limbago alah dituang.
Alah baguyang batang pinang
Badariak kalo-kalo,
Darah alah dikacau
Dagiang alah dilapah
Tanduak alah ditanam,
Ditiliak Nagari Lubuak Tarantang nangko
Nan Tanamo Tontang Iko”
Nan Talatak di Kaki Bungka
Dalam Wilayah VII Koto Sungai Lansek,
Nan talatak di ikua luhak Kapalo Rantau,
Nan ba batang ka Pagaruyuang,
Ba Bapak ka Tanjung Ampalu,
Ba Ibu ka Sijunjung,
dan Ba Mamak ka Palangki,
Ba balai Gadang Anam Baleh Koto,
di Batang Barangan (Palangki).
Kaki Bungka Lubuak Tarantang
dibawah pimpinan Urang Tuo Datuak Rajo Bandaro Jo Datuak nan batujuah,
suku nan Ampek, jinih nan 18 (lapan Baleh)
Adopun Suku Nan Ampek;
Partamo : Suku Melayu.
Penghulunyo Datuak Omar Penghulu
Montinyo Bagindo Ajo
Malinnya Palito Malin
Dubalangnyo Pandeka Rajo
Dan Baurang tuo Bagindo Malin
Kaduo : Suku Petopang.
Penghulunyo Datuak Majo Indo
Montinyo Tungkek Ome
Malinnya Malin Ome
Dubalangnyo Jangguaik Ome
Dan baurang tuo Malano
Katigo : Suku Piliang.
Penghulunyo Datuak Bandaro Kuniang
Montinyo Monti Bandaro
Malinnya Palito Bandaro
Dubalangnyo Mongguang
Dan baurang tuo Palindih
Kaampek : Suku Panai.
Penghulunyo Datuak Panghulu Bosa.
Montinyo Monti Marajo
Malinnya Malin Putiah
Dubalangnyo Malintang Panai
Dan baurang tuo Pangka
Bukan Lubuak Tarantang Bak kini
Koto Kimpalan dahulunyo
Kini banamo Lubuak Tarantang
Lubauk Tarantang adolah
Suatu kesatuan masyarakat hukum adat
Nan mampunyoi soko jo pusoko
Pusoko Nagari Lubuak Tarantang:
Bak bakayu nan sabatang ;
Ado nan duduak di Pucuak Bulek
Adolah niniak Datuak Naro
Gadangnyo ka nan Tunjuah Koto
Rajo adat di Nagari.
Ado nan duduak di urek tunggang
Adolah niniak Datuak Lipati
Gadangnyo kadalam nagari
Urang Tuo di nagari
Ado nan duduak di Dahan Daro
Adolah Niniak Datuak Bandaro Kuniang
Gadangnyo manti dek nagari
Ado nan duduak di comin toruih
Adolah Niniak Datuak Majo Indo
Gadangnyo malin dek nagari
Kini, Ninik mamak Kaki Bungka Lubuak Tarantang, Menambah ukiran bersejarah.
Mangukuhkan Limbago Adat Lamo Pusako Usang, Nan banamo Kerapatan Adat Nagari (KAN) Lubuak Tarantang
Batambah pulo KAN di Kabupaten Sijunjung Nangko Dari jumlah 47 manjadi angko 48.
Untuk itu, mari kito bersyukur kapado Allah Swt, Dengan mengucapkan Allhamdulillah hirabbil alamin...,
Dan Berselawat Kapado Nabi Muhammad,Saw.
Allahummasyalialah Saidina Muhammad,
waalaalisuaidinna Muhhammad
Fil’alamina innaka hamidul majid,
Saroto mengucapkan Selamat,
kapado pemangku adat, ulama, codiak pandai jo bundo kanduang ,
cucuang kamanakan di nagari Lubuak Tarantang nangko
Dan Terakhir, Tarimo kasiah banyak kami sampaikan kapado;
Angku Syafri Antoni Dt. Kayo Ketua KAN Sungai Lansek, basaroto seluruh pengurus
nan alah merekomendasikan Nagari Lubuak Tarantang, sahinggo dapek dikukuhkan Limbago Adat Lamo Pusako Usang dan Kerapatran Adat Nagari (KAN) Lubuak Tarantang,
Dan juo ucapan nan samo sampaikan khusus kapado;
Angku Wali Nagari Lubuak Tarantang,
nan alah saponuah hati mendukuang untuak terujudnyo, Pengukuhan Limbago adat lamo pusako usang nangko
dan angku-angku Ketua KAN dan Wali Nagari dalam wilayah VII Koto,
tarima kasih ateh dukungan dan perhatiannyo.
Limbak nan dari pado itu
Manuruik adat lamo pusako usang
Mambangkik batang tarandam
Walau bak mano ragam dunia,
Baturuik juo saluruihnyo.
Patando Basyukur kapado Allah
Batarimo kasiah kapado niniak nan manaruko, Jolong mancancang jo malateh
Mulo marambah jo malamun, Tampek manabang manaruko, Bakeh batanam baro bilah, Sajak samulo bataratak, Lalu ba dusun nan baumpuak, Sampai bakorong jo bakampuang.
Lah jadi koto jo nagari
Tabantang labuah jo tapian
Tadiri balai jo galanggang
Tumbuahlah Nagari Lubuak Tarantang nangko, Hinggo kito dapek hiduik santoso
Ambacang di tangah padang,
Ditingkek tangah duo tingkek
Batang pauah sadang babungo
Kok dirantang namuahnyo panjang
Elok dikumpa nak nyo singkek
Diambiak sajo nan paguno
Lah babagai buah rundiangan
Awa dirunuik kapamulai
Taga dek khilaf jo khilapat
Kalau batamu silik sumbiang
Kok ratak tolonglah simpai
Hinggo itu curai paparan
Lahia jo batin saukuran
Isi kulik sarupo lahia
Tibolah lukih ka limbago
Hancua siriah manjadi sapah
Sirahnyo tampak dibibia
Pariso maruang tubuah
Sajuak anggoto katujuahnyo
Dari awa sampai akhia,
Gawa jo khilaf sifat kito
Nak jan binaso papan dek ukia
Barilah maaf badan ambo
Wabillahi taufik walhidayah Wassalamu'alaikum warahmatullahi wabarokatuh.
#GP | Sijunjung | 29 Oktober 2022.
Tidak ada komentar:
Posting Komentar