Oleh : H.Epi Radisman Dt.Paduko Alam, SH
Sijunjung (SUMBAR).GP- Sairiang balam jo barabah, Barabah lalu balam mandi,Tabang maraok masuak samak, Sairiang salam nan jo sambah, Sambah lalu salam kumbali Salam taujuak ka nan banyak.
Dari Koto Jadi Nagari, Ado Ba tapian jo ba labuah, Asa mulonyo dari taratak, Sungguahpun Ambo tagak badiri, Dibatin duduak basimpuah, Ampun jo maaf nan dimintak, Bagai awa pamulai kato, Sipatan rundiang pandahuluan, Salam taunjuak ka nan basamo, Kan ganti bajawek tangan
Assalamu alaikum warahmatullohi wabarokatuh.
Gadang nan indak disabuikan gala,
Ketek nan indak di imbaukan namo,
Samo basa bak basimbuah,
Samo kanai bak mambiru,
Samo didalam himbauan ambo.
Jo salam sambah dianjuang,
Samo bamohon kapado Allah,
Salawat jo salam kapado Nabi,
Salam salamat diucapkan;
Dek buek bakeh bahuni,
Dek alua tak buliah tidak,
Walau bak mano ragam dunia,
Baturuik juo saluruihnyo.
Sambah lalu salam kumbali,
Kapado sagalo nan adok adang,
Indak diatok dibilang gala,
Kapaatok pambilang juo,
Nan gadang kok kurang sambah,
Nan tinggi kok kurang anjuang,
Sambah jo salam pamanuhi.
Dek duduk manganduang niat,
Kok tagak manganduang cinto,
Siang malam rintang manyabuik,
Patang pagi tak kunjuang lupo.
Suri tagantuang nak bauleh,
Buncai tarantang nak nyo sudah,
Mambangkik batang tarandam,
Adat Lamo Pusako Usang,
Kinilah baru kan bakakok.
Manuruik Adat nan kawi
Syarak nan lazim
Adat Basandi Syara,
Syara Basandi Kitabullah
Syara Mangato Adat Mamakai
Alam Takambang Jadi Guru
Jikok dicaliak dipandangi
Pandang dakek alah ditukiakkan
Pandang jauh alah dilayangkan
Mambangkik batang tarandam
Mambangun Limbago Adat
Alah manuruik alua jo patuik
Alah manuruik labuah nan pasa
Artinyo bana alah balicak pinang,
Alah batapuang batu,
Alah sasuko nan sanagari,
Adat alah diisi -
Limbago alah dituang.
Alah baguyang batang pinang
Badariak kalo-kalo,
Darah alah dikacau
Dagiang alah dilapah
Tanduak alah ditanam,
Ditiliak Nagari Kampuang Dalam nangko
Nan Tanamo Bakampuang Karumah Dalam
Nan Talatak di Kunci Bunian
Dalam Wilayah Jambu Lipo”
Dibawah pimpinan Urang Tuo Datuak Panghulu Kayo suku nan Ampek, Limo jo Kampuang Rajo, Adopun Suku Nan Ampek; Limo Jo Kampuang Rajo di Kampung Dalam adalah ;
Suku Panai Malayu, Penghulunya adalah Datuak Panghulu Kayo, sebagai Manti adalah Manti Marajo, Dubalangnya adalah Dubalang Sati, Panditonya adalah Malin Sampono dan Panobali adalah Ompang Sati
Dalam Suku Piliang, sebagai Penghulu adalah Datuak Rajo Dipadang, Mantinya Lenggang Marajo, Dubalang adalah Maranjang Tuah dan Panditonyo Sampono Malin.
Suku Caniago, sebagai Penghulu Datuak Penghulu Sati, Manti adalah Mogek Nan Soko, Dubalang, Paduko Sati,
Pandito nyo Malin Kayo dan Pasak Malintang , Bamurai Sati.
Dalam Suku Patopang, Penghulu, Datuak Peto Alam, Manti, Palanta Bonsu, Dubalang, Rajo Bujang, Pandito , Malin Markesa
Kampung Rajo, Urang Gadang, Rajo Godang, Pucuk Adat, Bagindo Malin, Manti, Manti Marajo, Dubalang, Dubalang Sati, Pandito , Malin Sampono
Bukan Kampuang Dalam Bak kini
Bakumpua Karumah Dalam dahulunyo
Kini banamo Kampuang Dalam
Manuruik Limbago Adat Lamo Pusako usang Minangkabau, Dan sasui pulo jo Perda Sumatera Barat No.6/2014
Tentang Penguatan Lembaga Adat dan Pelestarian Nilai Budaya Minangkabau.
Tanyato Kampuang Dalam adolah
Suatu kesatuan masyarakat hukum adat
Nan mampunyoi soko jo pusoko
Kini, Ninik mamak Kampuang Dalam,
Menambah ukiran bersejarah. Mangukuhkan Limbago Adat Lamo Pusako Usang, Nan banamo Kerapatan Adat Nagari (KAN) Kampuang Dalam
Batambah pulo KAN di Kabupaten Sijunjung Nangko, Dari jumlah 48 manjadi angko 49. Untuk itu, mari kito bersyukur kapado Allah Swt, Dengan mengucapkan Allhamdulillah hirabbil alamin.., Dan Berselawat Kapado Nabi Muhammad Swl,
Allahummasyalialah Saidina Muhammad,
waalaalisuaidinna Muhhammad.
Fil’alamina innaka hamidul majid,
Saroto mengucapkan Selamat;
kapado pemangku adat, ulama, codiak pandai jo bundo kanduang ,
cucuang kamanakan di nagari Kampuang Dalam nangko
Dan Terakhir ; Tarimo kasiah banyak kami sampaikan kapado Angku Ir. Asri Antipen Dt. Paduko Rajo, MM, Ketua KAN Lubuak Tarok basaroto seluruh pengurus dan Pemengku Adat Lubuak Tarok, nan alah merekomendasikan Nagari Kampuang Dalam, sahinggo dapek dikukuhkan Limbago Adat Lamo Pusako Usang
dan Kerapatran Adat Nagari (KAN) Kampung Dalam,
Dan juo ucapan nan samo ambo sampaikan khusus, kapado angku Wali Nagari Kampuang Dalam, nan alah saponuah hati mendukuang untuak terujudnyo, Pengukuhan Limbago adat lamo pusako usang nangko, dan angku-angku Ketua KAN dan Wali Nagari
dalam wilayah Kerajaan Jambu Lipo khusausnyo dan Kecamatan Lubuk Tarok pado Umumnyo, tarima kasih ateh dukungan dan perhatiannyo.
Limbak nan dari pado itu
Manuruik adat lamo pusako usang
Mambangkik batang tarandam
Walau bak mano ragam dunia,
Baturuik juo saluruihnyo.
Patando Basyukur kapado Allah
Batarimo kasiah kapado niniak nan manaruko
Jolong mancancang jo malateh
Mulo marambah jo malamun
Tampek manabang manaruko
Bakeh batanam baro bilah
Sajak samulo bataratak
Lalu ba dusun nan baumpuak
Sampai bakorong jo bakampuang
Lah jadi koto jo nagari.
Tabantang labuah jo tapian
Tadiri balai jo galanggang
Tumbuahlah Kampuang Dalam nangko
Hinggo kito dapek hiduik santoso
Ambacang di tangah padang,
Ditingkek tangah duo tingkek
Batang pauah sadang babungo
Kok dirantang namuahnyo panjang
Elok dikumpa nak nyo singkek
Diambiak sajo nan paguno
Lah babagai buah rundiangan
Awa dirunuik kapamulai
Taga dek khilaf jo khilapat
Kalau batamu silik sumbiang
Kok ratak tolonglah simpai
Hinggo itu curai paparan
Lahia jo batin saukuran
Isi kulik sarupo lahia
Tibolah lukih ka limbago
Hancua siriah manjadi sapah
Sirahnyo tampak dibibia
Pariso maruang tubuah
Sajuak anggoto katujuahnyo
Dari awa sampai akhia,
Gawa jo khilaf sifat kito
Nak jan binaso papan dek ukia
Barilah maaf badan ambo
#GP | Sijunjung | 19 Oktober 2022.
Tidak ada komentar:
Posting Komentar