Ketua LKAAM Kabupaten Sijunjung
Bismillahirrahmanirrahim
Sijunjung (SUMBAR).GP- Sairiang balam jo barabah, Barabah lalu balam mandi, Tabang maraok masuak samak, Sairiang salam nan jo sambah, Sambah lalu salam kumbali, Salam taujuak ka nan banyak.
Dari Koto Jadi Nagari, Ado Batapian Jo Balabuah. Asa Mulonyo Dari Taratak, Sungguahpun Ambo Tagak Badiri, Dibatin Duduak Basimpuah, Ampun Jo Maaf Nan di mintak, Bagai awa pamulai kato, Sipatan rundiang pandahuluan, Salam taunjuak ka nan basamo, Kan ganti bajawek tangan
Assalamualaikum Warahmatullahi Wabarokatuh.
Gadang nan indak disabuikan gala,
Ketek nan indak di imbaukan namo,
Samo basa bak basimbuah,
Samo kanai bak mambiru,
Samo didalam himbauan ambo.
Jo salam sambah dianjuang,
Samo bamohon kapado Allah,
Salawat jo salam kapado Nabi,
Salam salamat diucapkan;
Dek buek bakeh bahuni,
Dek alua tak buliah tidak,
Walau bak mano ragam dunia,
Baturuik juo saluruihnyo.
Sambah lalu salam kumbali,
Kapado sagalo nan adok adang,
Indak diatok dibilang gala,
Kapaatok pambilang juo,
Nan gadang kok kurang sambah,
Nan tinggi kok kurang anjuang,
Sambah jo salam pamanuhi.
Dek duduk manganduang niat,
Kok tagak manganduang cinto,
Siang malam rintang manyabuik,
Patang pagi tak kunjuang lupo.
Suri tagantuang nak bauleh,
Buncai tarantang nak nyo sudah,
Bakaua Adat sasudah tuai,
Kinilah baru kan bakakok.
Manuruik Adat nan kawi
Syarak nan lazim
Adat Basandi Syara,
Syara Basandi Kitabullah
Syara Mangato Adat Mamakai
Alam Takambang Jadi Guru
Jikok dicaliak dipandangi
Pandang dakek alah ditukiakkan
Pandang jauh alah dilayangkan
Alah manuruik alua jo patuik
Alah manuruik labuah nan pasa
Artinyo bana alah balicak pinang,
Alah batapuang batu,
Alah sasuko nan sanagari,
Adat alah diisi -
Limbago alah dituang.
Alah baguyang batang pinang
Badariak kalo-kalo,
Darah alah dikacau
Dagiang alah dilapah
Tanduak alah ditanam,
Ditiliak tampek bakaua nangko
Nan Tasabuik Bukik Pauah Onggang/Ponggang
Nan Talatak di Kampuang Baru
Bukan Kampuang Baru Bak kini
Pauah Anggang jo Basra dahulunyo
Kini banamo Bukik Pauah Onggang
Bukik Pauah Onggang
Nan Dijago dek bukik Kicauan
Guguak Nan bulek - Batu Badindiang
Lubang Ngaghai - Pincuran Anyie
Loban bungkuak - Batu badaguak
Ngalau basurek - Aua Sonsang
Titian Toghe - jo Tapian Ambun
Badoli-doli niniak ka kubang siraok
Baondoh-ondoh ka kubang silado
Rabah pitunggua nan sambilan
Tumbuah bijo nan sabaleh
Ditanam datuak nan duo puluah
Pauah Onggang adolah satu diantaro koto nan sambilan
Buatan Datuak Nan Duo Puluah
Adopun Koto Nan Sambilan ;
Pauah Onggang (Kampuang Baru) Tambang Batang (Batu Manjulua)
Buluah kuniang pamatang dialai (Ambacang Kamba/Koto Baru)
Pisang kolek - gajah mati (Ambacang Kamba/Koto Baru)
Gontiang - Muaro Suo (Ambacang Kamba/Koto Baru)
Sambilan jo Batang barangan (Palangki)
Pauah Onggang kini banamo Kampuang Baru
Bagaikan talua didalam ngalau
Usahkan pocah
Ratakpun tido
Nan dijago dek Datuak nan Duo Puluah
Nan Dipaliharo dek Datuak nan sabaleh
Adopun Datuak Nan Duo Puluah
Tasabuk Datuak sapuluah di mudiak
Limo di Supayang
Limo di Saru-aro
Dan Datuak sapuluah di hilia
Limo di Kobun (Mundam Sakti)
Limo di Ambacang Kamba (Koto Baru)
Sadangkan Datuak Nan Sabaleh
Limo di Silungkang (Ci lun kang/ Nago Lalok)
Anam di Padang Buluah Kasok (Padang Sibusuak)
Kok disimak pulo Adat di Kampuang Baru
Nan tasabuik ampek suku
Badatuak nan barampek
Bungo bakarang Datuak nan baduo
Cukuik jo Datuak Mangguntiang Simba Baju
Ba Monti Nan Barampek
Ba Malin jo Pandito Nan Batujuah
Hulu Balang Nan Balimo
Langkok Bajinih nan Duo Puluah Tigo
Nak siang bak hari
Nak tarang bak bulan
Elok dibilang ciek-ciek
Nak tampak baniah bijonyo,
Adopun Datuak Nan Barampek
Datuak Nan Kodo Malin (Marlius (alm) Suku Sikumbang Gadang
Datuak Nan Kodo Banjar (Mulhendri suku Sikumbang Korong Gadang)
Datuak Penghulu Malin (Syamsuar suku Caniago)
Datuak Penghulu Sati (Zul suku Melayu)
Bungo bakarang Datuak nan baduo:
Datuak Rajo Nan Sati (Irzal suku Sikumbang Gadang)
Datuak Mandaro Nan Sati (Darmawi suku Melayu)
Datuak Mangguntiang Simba Baju :
Nan bagala Datuak Nangkodo Sati (Bustami (alm) Suku Sikumbang Godang
Mano Monti Nan Barampek;
Nan Kodo Bajuang (Zulkifli suku Sikumbang)
Rajo Mangkuto (Mawardi suku Sikumbang Korong Gadang)
Lenggang Sutan (Mansurdin suku Caniago)
Mantari Alam (Syofyan (alm) suku Melayu
Dibilang pulo Malin Jo Pandito Nan Batujuah:
Pandito Barain (Nur Muhammad suku Sikumbang Gadang)
Pandito Kayo (Makmur Suku Sikumbang Gadang)
Pandito Sulaiman (Syafrizal suku Sikumbang Korong)
Pandito Rajo Mudo (Raplis suku caniago)
Pandito Sinaro (Zul Akmal suku Caniago)
Pandito Majo Sati (Maizar suku Melayu)
Pandito Malin (Saipul suku Melayu)
Cukuik jo DubalangNan Balimo ;
Mangkuto Sati (Burhanuddin (alm) suku Sikumbang Gadang)
Intan Batuah (Jalinus suku Sikumbang)
Ompang Bosa (M. Saleh suku Sikumbang Korong Gadang)
Sutan Marajo (Basri suku Caniago)
Ompang Sati (Suardi suku Melayu)
Limbak nan dari pado itu
Manuruik adat lamo pusako usang
Bakaua adat sudah tuai
Walau bak mano ragam dunia,
Baturuik juo saluruihnyo.
Patando Basyukur kapado Allah
Batarimo kasiah kapado niniak nan manaruko
Jolong mancancang jo malateh
Mulo marambah jo malamun
Tampek manabang manaruko
Bakeh batanam baro bilah
Sajak samulo bataratak
Lalu ba dusun nan baumpuak
Sampai bakorong jo bakampuang
Lah jadi koto jo nagari
Tabantang labuah jo tapian
Tadiri balai jo galanggang
Tumbuahlah Kampuang Baru nangko
Hinggo kito dapek hiduik santoso
Ambacang ditangah padang
Ditingkek tangah duo tingkek
Batang pauah sadang babungo
Jikok dirantang namuahnyo panjang
Elok dikumpa nak nyo singkek
Ambiak sajo nan ka paguno
Lah babagai buah rundiangan
Awa dirunuik kapamulai
Taga dek khilaf jo khilapat
Kalau batamu silik sumbiang
Kok ratak tolonglah simpai
Hinggo itu curai paparan
Lahia jo batin saukuran
Isi kulik sarupo lahia
Ganggam arek pagangan taguah
Tibolah lukih ka limbago
Hancua siriah manjadi sapah
Sirahnyo tampak dibibia
Pariso maruang tubuah
Sajuak anggoto katujuahnyo
Sakian titah bakaua adat sasudah tuai
Kato sudah hinggo bak kian
Salam salamat diucapkan
Rabbana atina fidunya hasanah
Wafilakhiratih hasanah
Wakina azabannar
Wabillah taufik wal hidayah
Wassalamualaikum Warahmatullahi Wabarokatuh
#GP | Sijunjung | 23 Oktober 2022
Tidak ada komentar:
Posting Komentar