Sekilas tentang LUHAK TANAH DATA Menuruik "TAMBO ALAM MINANGKABAU"

Ulasan (1) oleh: 

 H Epi Radisman Dt Paduko Alam SH.

 Ketua LKAAM Kabupaten Sijunjung.

Sijunjung (SUMBAR).GP-  Ketua rombongan Sutan Sri Maharajo Dirajo ba semayam di Pasumayan Koto Batu,  Puputan angin si- Dolak Dolai, 

Dimano Banto nan Barayun,

 Di Langgundi nan Baselo, 

Diateh Batu Hampa Putiah, 

Sirangkak nan Badangkang, 

Buayo putiah daguak,

Banamo Guguak Ampang,

Sawah Satampang Baniah, 

Dilereang Gunuang Marapi,

Diateh Nagari Pariangan,

Nan alah ado  20 abad tahun nan lalu.

* Manurun KA bawah mambuek tompek kediaman, mangko tajadilah duo buah Nagari yakni Nagari Pariangan dan nagari Padang Panjang.

Dek aie basentak turun, lauikpun samakin kariang,

Daratanpun batambah laweh. 

Mulailah Niniak bacocok tanam,

Mandirikan tompek tingga nan samakin banyak dan barikuiknyo pengatur masyarakat jo tatanan adat-istiadat nan mareka patuhi basamo.

Diangkeklah duo orang Penghulu nan bagala Datuk Bandaro Kayo untuak koto Pariangan dan Datuk Maharajo Basa untuk koto Padang Panjang  dek Datuk Suri Dirajo nan basuku Bodi.

Koto Pariangan dan Koto Padang Panjang semakin ramai, urang bapindah mambuek nagari baru nan  banamo Sungai Jambu.  

Nagari Parianganpun bakambang menjadi 8 (Salapan) Koto, yaitu : Pariangan, Padang Panjang, Guguak, Sikaladi, Koto Tuo, Koto Baru, Sialahan dan Batu Basa,

Ikolan nan disabuik Tampuak Tangkai Alam Minangkabau.

Tampuaknyo adolah Dt.Bandaro Kayo, dan 

Tangkainyo adolah Dt.Maharajo Basa.

Kamudian jalur iko bakambang pulo manjadi

Jalur Batang Bangkaweh, 

arah ka danau Singkarak dengan nagari-nagari: Galo gandang, Padang Magek, Padang Lua, Taruih ka Balimbiang, Bukik Tamasu. 

Sahinggo sajalur Jo Batang Bangkaweh,

Mulai dari Bukit Tamasu dan bacanggak ka ateh sampai ka Guguak Sikaladi,  

Dinamoi Lareh Nan Panjang, 

Yaitu suatu wilayah nan badiri sendiri, kamudian dengan sebutan :

Pisang sikalek kalek utan,

Pisang Timbatu nan bagatah,

Samo dimakan kaduonto,

Bodi Caniago inyo bukan,

Koto Piliang inyo antah,

Samo dipakai kaduonyo,

Setelah Sungai Jambu,

Masyarakat Minangkabau taruih bakambang dan mencari tampek kediaman baru,

Bapindah satu rombongan mancari tanah nan data di kaki gunuang Merapi.

 Dicancang latiah tampek diam,

Babungo satangkai rimbun, 

DiKuribang Batu alang,

Dibawah kayu batarok,

Kalualah aie nan janiah,

Nan tasabuik Bungo Satangkai, 

Disungai Kayu Batarok, 

Dibatu nan salapan tapak,

Nan tasabuik Sungai Tarok Salapan Batu,  atau Kerajaan Bungo Satangkai,

Nan baikua ba kapalo,

Nan bakapak nan baradai,

Nan balanggam nan tujuah.

Ba kapalo ka Koto Baru,

Ba ikua ka Gurun, 

Ba kapak ka Sumaniak,

Baradai ka Koto Tuo 

(Bersambung)....

Salanjuiknyo Langgam Nan Tujuah: (2)

#GP | Sijunjung | 7 September 2022