Judul dari materi pembinaan tersebut " Pituah Mamak Bakeh Kemanakan" bertempat di Ruang Balai Pertemuan Kantor Wali Nagari yang juga dihadiri Wali Nagari Tanjung Labuah Aldi Nasri, S.Pd.
Pembekalan Para Bundo Kandung yang berlangsung sehari penuh itu, dibuka secara resmi oleh Wali Nagari Aldi Nasrul, S.Pd dengan harapan semoga para peserta dapat mengikuti pembekalan ini dengan serius, tukuknya.
Adapun materi yang dicurahkan sang Datuak itu dalam dealek asli Minangkabau itu penuh dengan kata-kata kias sebagai berikut;
"Oii... Upieek kamanakan Mamak!.."
Urang nan jolong gadang, mujuah isuak kok lai ka manjadi "Bundo Kanduang, limpapeh dalam kaum, nan ka manarimo pusako dirumah gadang" nan duduak-nyo marawik ranjau, tagak-nyo nan lai ka maninjau jarak._ _Diarokkan ka manjadi bijo bayiek, pasumarak bungo dihalaman, dimano rumpun nan lai ka-kambang!
_Kok untuang, kamanakan gadang isuok, usah lupokan pitaruah Mamak!..._ _Kana-kana banalah!._ _Jikok satitiek tolong lawikan, jampang sakapa tolong malah digunuangkan!..._
_Adopun, kato urang nan cadiak tahu-pandai, mambagi parampuan ko kapado ampek jinieh rupu-Nyo;_
1. _Rang padusi Barau-barau._
2. _Rang padusi Layang-layang_
3. _Rang padusi Lawa-lawa._
4. _Rang padusi Ramo-ramo._
_Rang padusi Barau-barau adolah;_ _parampuan nan ilieh-mudiek, gilo basorak jo basorai dan sato pulo-nyo bakuaai, patang sarato pagi heboh bakicau jo manyaracau, la sasak rimbo sarato samak dibueknyo._ _Itulah misal jo umpamonyo, rang padusi indak punyo jakun, mangecek indak bapikie. Apo nan katuju nyo sabuik, nan takana-nyo baco, karajo-nyo gilo batandang hilieh jo mudiek, basorak jo batabuah, sarato gunjiaang._Aib urang nyo kaka-kaka, malu kawan nyo singkok-singkok, rasio laki kamari basingik-an, bingik jo dangki, asuang jo pitanah, maupek jo mancaci jadi pamenan bibie, jikok ado nan elok ba-a nan ka buruak pandangan urang!._ _Sahinggo bumi manyumpah , langik mangutuak, itulah rang padusi nan cilako, jawuahkan banalah parangai sarato sipaiek nan bak kian kamanakan!..._
_Nan dikatokan rang padusi Layang-layang; malayok-layok kian-kamari, maradai bapalun-palun jo awan, babega-bega manyonsong angin._ _Suko manukiek dinan rami, mainnyo diateh- ateh, keceknyo maninggi taruih, indak ado nan rancak dari pado inyo, urang lain di anggap sarok sajo._ _Itulah rang padusi nan mati karancak-an, suko malala jo malanjah, singgah sinan mahampieh kamari._ _Lupo jo kawajiban rumah tanggo, cayah jo salah latak layanan ka junjuangan, nan la nyato ratak-baparinggo, mananti pacahnyo sajo hanyo lai._ _Usah dipadomani jo dibayangkan nan bak kian Kamanakan!!!..._
_Dan,_
_Baa pulo nan dikatokan parampuan Lawah-lawah:_ _Mambuek sarang elok rupo-nyo, batarawang sutra, bajalin rapek jo tasusun, basulam suji samo jarang, haluih nan bak umpamo banang suto._ _Tapi pahamilah,_ _nan lahie-nyo sarang tabantang, dibathin-nyo jarek nan tarantang, manggatah tiok urang lalu._ _Jampang kok sasek sipatuang singgah, tapasok bilalang inggok, nyo bagageh maniayo, niak salah parangai jaek, manyasok darah dalam dagiang, mancucuik isi utak banak urang, lah jadi bangkai di tinggakannyo._ _Itulah parampuan paling hino, bantuak rancak tutua kato-nyo manih, baso katuju, paramah pulo tapi pangana-nyo nak mangaruak puro urang sajo._ _Manyamun jo marampok-nyo jo suduik mato, manipu jo galak manih, mantiek kecek rang kini._ _Iko namonyo parampuan tukang panguah, semba kakida rayieh kasuok, tamak sarato loboh, rakuih sarakah pulo, suko mangicuah ka laki, dunsanak diumbuak-umbai dek karano barado, mato duitan rang katokan, cewek matre istilah rang subarang, malu nan la tajua, paham tagadai, dek karano pitih._ _Pantangkan bana sipaek sarupo iko, oi nak gadih bungo nan ka kambang dijambangan, didunia hiduik ko hino, di akhira'ik masuak narako awak dibuek-nyo._ _Sakali-kali jan dipakai nan bak kian Kamanakan!!!..._
_Nan iko iyolah pangabisan atau nan ka ampek (4) Kamanakan!..._ _Adopun satantangan rang Padusi (Wanita/Perempuan) Ramo-ramo, babadan sariang, bapinggang bak karanggo, bantuak rancak bamego-mego, sayok baukieh baliak-balah, nampak baliek-batimbah, lambuik jo lunak sajuak malayok, lahieh sehat, bathin banurani nan hidui bahakikat, bulieh awak mandapek safa'at nan sasuai jo syari'at._ _Maso kalua bakutiko, tabangnyo maagak-agak, bapantang kamari inggok._ _Gadang jo nan ketek suko mamandang, tuo mudo sanang mancaliak , basalahan sia nan manggaduah, kok kunun ka mancakau kapamenan patang jo pagi, batanyo jikok ka pai, babarito jampang la babaliek._
_Tajago budi-bayiek jo martabat, akhlak bapaliharo pulo, didalam martabat nan anam._ _Jikok-nyo tidua bakalang adat, tagak-nyo balandaskan jo undang, bajalan batungkek, syarak balimbago. Ta'at ka aturan, setia/hormat kajunjungan (suami), sopan-santun ka ayah jo mande, pandai ma-agak jo ma-agiehkan bagawua samo gadang, bakasieh-sayang jo sumandan, dianjuang dek ipah jo bisan, tapakai dalam kaum, basamo-samo dalam suku, ba-sosialisasi di nagari, ba-adaptasi ditangah-tangah masyarakat._ _Manjadi bundo kanduang limpapeh, ambun puruak aluang bunyian, pasumarak dalam korong jo kampuang, panjawek pusako dirumah nan gadang._ _urang nan ka manarimo Nashaf Matrilinial di Minangkabau._
Kalilawa dipulau rimbang,
Anak ruso mati tadabiah,
Kok gawa ambo mintak ditimbang,
Kok doso ampun nan labiah.
Demikian tercurah kata-kata berbahasa Minangkabau yang berintonasi khas dari mulut Datuak Paduko Alam yang juga Wakil Ketua Umum LKAAM Sumbar tersebut.
#GP | Era | Herman.
Tidak ada komentar:
Posting Komentar